【Viu】張繼聰、Kay 謝安琪今日喺圓方出席汽車品牌活動，當司儀Thor駱振偉問到佢兩個是咪首次夫婦檔出席活動？阿聰鬼馬咁話：「我有去佢婚禮囉！」Kay亦附和：「係呀！我都有去佢婚禮。」之後Thor問佢兩個揀車要有咩條件？Kay即望住老公問：「我都想問，車佔你人生幾大部分呢？」求生意志極大嘅阿聰，即刻話：「車對男人嚟講只係生命一部分，家庭先係最重要，相信大部份男士都會認同。」講到首次以夫妻檔出席商業活動，阿聰都話婚後真係第一次，佢話因為今次係電動環保車，加上酬勞係「誠意價」，所以答應出席，問到夠唔夠買返架新車？佢就話要問返身邊嘅「主人」Kay，仲話自己嘅酬勞都係畀晒對方打理，所以實質有幾多錢佢自己都唔知。
女主人Kay近日仲投其所好，考咗兩個轆牌同老公遊車河，佢話：「我嗰陣以為佢係揸快車嗰啲嚟，點知坐完又幾穩陣，同巴士差唔多速度，我有為咗咁而幫佢加分。依家每個星期日佢都同幾個男人約埋，襯好晒衫咁出去，返嚟又會影好多靚相，都幾開心。我見到佢咁，我自己都去考返個電單車牌。」呢 啲老婆真係去邊搵吖！
