憶老婆生B插喉哽咽　娃娃舜感動萬千網民

網絡舞王「娃娃舜」黃宏舜喺15年前於《都市閒情》自信展示「後現代舞藝」，技驚四座！可惜當時遭到評判江華狠批「太有自信」，一方面成為網絡笑話，一方面激起唔少網民同情。後來阿舜消失於江湖之中，大家紛紛尋找佢嘅下落，但流言四起，有人話佢犯法坐監，甚至有傳佢死於沙士，直到去年阿舜終於復出喇！只見阿舜身形比以前暴漲，仲結咗婚生埋女，但唯一冇變嘅就係佢依然舞技精湛，「娃娃舞」重現江湖！

最近阿舜獲邀拍牙膏廣告，佢嘅號召力大，片段上載後點擊率高達37萬。片中嘅阿舜娓娓道來自己嘅人生，回想起當年佢大無畏喺台上跳舞畀人笑，但依家佢話已放開懷抱面對，並笑指：「我好Enjoy！」佢又話唔理有冇得到台下掌聲，享受過程先最重要，睇嚟阿舜同當年一樣，都係咁有自信！

雖然阿舜重出江湖拍廣告，但佢依然要做嘢養起一頭家，而佢嘅正職其實係一名地盤工人，所以片段亦有揭露阿舜平時工作嘅真實一面。睇見阿舜做起嘢上嚟大汗疊細汗，就算擔擔抬抬亦毫無怨言，真係令人感受到辛苦錢係唔易搵架！雖然黑黑實實嘅阿舜平時畀人感覺Cool都震，好似唧都唔識笑，但當佢提起屋企出世冇耐嘅B女時，就面帶微笑咁話要搵多啲錢養家，佢又話囡囡係佢嘅原動力。嘩！聽到阿舜咁講，網民都話鐵漢都有溫柔嘅一面，有人更話畀咁Man嘅阿舜電親添。

另外，阿舜又喺片中憶述老婆生BB時嘅險況，佢話BB喺媽咪肚入面竟然調轉咗個頭，最後要另外開一刀，所以老婆當時瞓喺醫院插晒喉，好辛苦先至生到B女出嚟。講到呢度時，阿舜語帶哽咽好似有啲想喊咁，睇嚟佢當時真係好擔心！不過，佢話見到囡囡終於平安出世，之後成個人都鬆晒。而每當有人話囡囡似爸爸時，佢都會會心微笑，一面慈父樣！

喺片段嘅最後，阿舜當然要展示一下實力，大晒萬眾期待嘅「娃娃舞」啦！雖然舞技比以前有啲生硬，但台風依然，網民仲話簡直將「自信」昇華到另一個層次，流露出「職安真漢子」嘅韻味！今次條片更配以鏡頭效果及配樂，突顯出「娃娃舞」嘅神韻。不過阿舜實在天生有笑匠本能喇，所以搞到佢認真做乜，都係咁好笑嘅！有唔少網民睇完條片後，紛紛都話呢個廣告好笑兼感動！

網民有話兒：

Eddyxxxok：由心佩服阿舜。

Chi xxx ：經江華提點後，阿舜進化為頂天立地真漢子！

olixxx：地盤工作唔失禮。。全部都是專業人材！

黎xx：呀舜型過江華九條街，江華你知唔知你輸嘜（乜）？你就係衰在太無自信

Peter xxu：自信真係好緊要。 恭喜阿舜。