車路士季尾發力4連勝　有望搶第5名

今季長期喺聯賽榜中游徘徊嘅車路士，季尾突然發力，周四(16日)凌晨作客2比1擊敗白禮頓，喺英超連贏4場後升上第6位，只係落後第5位嘅熱刺3分，煞科日有機會過頭。領隊普捷天奴賽後大讚球隊克服今季重重難關，如果拎到歐洲賽資格會令佢非常光榮。

車路士延續近期勇態，34分鐘由高爾彭馬接應古古尼亞傳中頂入，後備上陣嘅尼干古喺64分鐘擴大紀錄，雖然列斯占士完場前食紅牌，打少個嘅車路士補時7分鐘被韋碧克攻陷，但佢哋仍保持2比1勝果至完場。車路士依家有60分，煞科戰主場對般尼茅夫，贏波有機會超越63分嘅熱刺，而佢哋只要拎1分，就肯定保住第6名歐洲賽席位。

普捷天奴賽後表示：「我覺得好光榮，呢3分令我哋有希望達成目標，就係下季出戰歐洲賽。今季我哋出現好多困難，但球隊都可以面對同克服，我覺得好驕傲。我唔知第6位算唔算係成功，事實上大家都唔在乎我講乜，對我嚟講最重要就係幫球隊贏波。」