編者按：香港傳媒高層訪京團上周二（16日）與中共中央政治局委員、中宣部部長黃坤明會面，團長蕭世和會後向駐京記者引述部長談話，事後鬧出主流媒體刪稿風波，引發集體自我審查的疑慮。香港電台發言人周四回應查詢表示，港台報道內容「沒有受任何干預，亦無經任何修改」，不過，眾新聞查證發現，事實並非如發言人所說「無經任何修改」，港台周二當晚7點的新聞簡報，有「希望香港媒體唔好成為干擾內地嘅政治基地」這句話，7點半的簡報這句話就被刪掉。
全文：媒傳高層訪京團風波 港台新聞簡報曾刪「干擾內地政治基地」
【撰文：港台前員工】
●「報道內容無經修改」，原來係「網上即時新聞無經修改」，咁即係話，半小時一節新聞簡報讀嗰啲，唔係「新聞報道內容」/ 唔係新聞；
●「調查完之後去出的事情發展」，原來又「不是改」，係「事情發展落去有一個進程」；
●咁係咪將來有一日，譚耀宗開完人大常委會之後同記者講咗啲好爆嘅嘢，跟住你「發覺個講法比較少見」所以打死都唔信，再堅持「從不同渠道查證」？係呀，做新聞要謹慎，但咁樣嘅邏輯做新聞，可能要十二個鐘頭後先出到街；
●「編採部一齊決定，唔係一個人」；新聞機構公營機構大中小企業乜都好，若果覺得係茲事體大，可能都會認真商量，但最後點都係一個人或幾個高層拍板孭飛。咁樣一個唔該卸埋落最前線嗰度，真係施丹轉身都望塵莫及；
●蕭生第二日話自己「無引述錯誤」，咁阿發言人話「查證番來都話無聽過呢個講法」嘅講法，究竟係乜嘢講法？
我想提醒一些人，認真思考打算講嘅每一句說話，是否都在挑戰人類智慧與常識。金漆招牌要幾十年建立，摧毀卻只需一晃眼。
