今日雖然落雨,但係同 @jojoba27 @monnie216 派口罩+消毒液 care package 任務大成功!
一直以黎大家堅持送口罩俾我...我最初唔收,因為想大家留返轉贈俾有需要嘅人。
但係後來發展到境外嘅朋友都開始寄去電視台俾我,而我自己私下同其他義工、仲有我認識嘅基層人士傾過,知道的確仍然有人需要口罩,所以我決定接受並且代大家去派。
由於派出嘅口罩係大家有份一齊捐出,我想俾返個詳細嘅報告大家。
1) 去垃圾站見到叔叔同姐姐,全部都守望相助,自己收到口罩後會提醒我哋派埋俾啱啱離開崗位又有需要嘅同事。
2) 我哋見到有個推住車嘅姐姐冇口罩,想送俾佢,佢好唔好意思咁婉拒叫我哋留返。我話:「姐姐!你真係唔可以慳,一定要戴㗎!」
姐姐好失落答:「我真係冇呀
一日要用兩個,但我只可以一個戴兩日」
我哋即刻攞多一份俾佢,佢望住40個口罩一路講多謝,然後開始喊,搞到我又喊,然後我哋忍唔住跑走咗。
3)去到一間失明人士學校附近,見到有視障叔叔同嬸嬸喺雨中等車,Monnie 派咗口罩俾佢哋,Jojo 就提議義載。最後Jojo 車咗四位視障嘅朋友返屋企。途中佢哋同Jojo 講好開心,因為落雨等車返屋企好困難。(下次再收集到口罩,我會直接攞去失明人士學校)
每次我諗到有咩行動都會即刻打俾Jojo,每次佢都即刻幫手!我同JoJo 深信,喺social media 報告我哋一直以黎嘅行動,從來唔係想話俾人知自己好好人;而係希望大家見得多會明白,呢個社會上,互相幫助係香港人最基本嘅份內事,而唔應該被視為好特別或者罕有嘅行為。希望大家睇得多,自己都識得去主動做,唔好怕呢樣嗰樣。因為我哋從來都唔諗咁多,有能力就去做。