退休係嘆世界定捱世界？　你要知道的退休真相

嚟緊4月1日有3件理財措施推出市面，分別係自願醫保、可扣稅MPF自願性供款，同埋延期年金。3個計劃政府都批準參與者可以扣稅，目的都係鼓勵香港人為退休盡早作計劃。

未來香港進入老齡化社會，2036年長者人口達237萬；港人預期壽命係全球最長，2017年男性及女性的平均預期壽命分別係81.7歲同87.7歲。政府都知道呢兩點，一方面推出多項退休措施，另一方面就「推遲」打工仔領取政府福利嘅時間，例如收緊福利嘅申請年齡（例如早幾個月熱烈討論嘅長者綜援）。

由於收緊長者綜援引發極大爭議，政府後來補鑊推出「就業支援補助金」，以平息民憤。但積臣觀察到政府似乎有意將60歲呢班人繼續留喺就業市場，唔想佢地咁早依賴政府福利。𠵱家香港未有法定退休年齡，各行各業嘅慣常做法係65歲退休，但當你喺60歲嗰時被人炒咗，基本上較難喺市場再就業，又或者就算畀你搵到，都要做低時薪、長工時嘅清潔、保安、飲食等勞動工作，先唔講技能可能錯配，到時你體能仲頂到已算好叻。

如果你搵夠，60歲退休係頤養天年，但未搵夠，政府又唔養你，到時只能繼續「捱世界」。但又咁講，𠵱家65歲呢批人，點解唔早啲準備好退休計劃呢？積臣有個uncle，退咗休，都要做散工去賺取生計，但幾乎日日返工，同長工無分別，但又無僱員福利，時薪又比退休前低。

今時今日形勢比當年更加嚴峻，最近英國《經濟學人》調查就指出，香港嘅生活成本已成為最球最貴嘅城市之一，未來情況係咪會惡化？積臣無水晶球唔會知。但如果今日年輕時唔早啲為退休做定準備，為將來嘅自己製造一筆被動式收入，當65歲退休時形勢更嚴峻的話，你就會喪失抵禦環境變化嘅條件同能力。

其實好多人會呻，基層人士工時長，工作忙碌，都無時間理財。其實𠵱家月供下股票，買下收息股，甚至參加即將推出的延期年金、可扣稅MPF自願性供款，已經算係一種較簡單、容易入場嘅退休理財方法，起碼每個月將一部份收入撥作儲蓄，逼吓自己儲錢。如果呢一步都懶，第時退休就無得怨唔可以環遊世界，反而仲要繼續「捱世界」。

【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。