達古辛淪熱刺大後備　傳重返意甲投拿玻里

熱刺今年1月斥資3,000萬歐元簽入羅馬尼亞中堅達古辛，不過半季以來只係踢過2次正選，佢經理人日前公開批評領隊普斯迪高路用人政策，據報拿玻里已準備向熱刺提出斟介，達古辛夏天有望重返意甲效力。

熱刺冬天搶贏拜仁慕尼黑，由熱拿亞羅致達古辛，但呢位22歲新星登陸英超後未受重用，基斯甸羅美路同雲迪尹嘅正選位置穩如泰山。唔少聲音要求熱刺踢3中堅，或者將雲迪尹移去左閘讓出中堅位置，但普斯迪高路已表明無意咁做。

達古辛經理人馬尼亞日前就公開反擊：「領隊多次強調唔會踢3中堅，好明顯佢覺得自己最清楚熱刺，不過熱刺失咁多波，3中堅可以更安全，達古辛嘅制空力亦可以改善防守死球。如果普斯迪高路講明達古辛只係一對中堅嘅替補，我好肯定達古辛唔會甘心長坐冷板。」

據英國《太陽報》報道，拿玻里有意喺夏天收購達古辛，而且可以保證佢正選位置，對達古辛嚟講無疑係吸引嘅選擇。達古辛由祖雲達斯青訓出身，之後效力森多利亞、熱拿亞等球會都有出色表現，返意甲可望重新起步。