世界係有萬千可能,三十三歲寫男人唔可以窮;三十四歲擁有自己寫嘅第一部電影。因為男人唔可以窮,我去過英國影展,去過北京見識香港以外嘅出版生態,中學都未畢業就學人入大學講talk。
呢幾年由飲食業再半隻腳踩入電影圈,我最榮幸係自己所寫嘅文字可以變成一幕幕畫面。名利其次,我總係覺得人要喺呢個世界上過癮咁走一個圈,到死嗰日先唔會後悔。
我唔係一個叻人,我有好多大家都有嘅缺點。我多謝當初好多網友,多謝高登俾一個平台我,俾我去打返十五分鐘花拳繡腿,令大家知道我呢條友唔係柒,再一直行到今時今日。
今年三十八歲,我人生覺得最過癮嘅事終於嚟:我要做導演喇。
以往睇無數次電影都會講無數次「點解會咁撚樣拍呀?」,其實可能我唔識,其實可能我講嘅都係錯,但係我就係想有一日,用自己個腦,拍一個自己覺得好嘅故事出嚟。
一個叫「起底組」嘅故事,一個講只要有機會,每個人都可以做英雄嘅故事。
可能我生得靚仔,監制伍健雄先生對我不薄,喺一套港產片budget嘅戲入面,容許我填入五個我想要嘅演員。
整件事籌備幾個月,一直都渾噩狀態,喺呢行已經習慣「開咗先講」嘅心態,總係唔敢開心。好怕一個電話,一秒就可以將我叫醒。
終於嚟到呢一日,「起底組」籌備完成,今日八月三號就要開鏡,宜家先係我爽皮嘅開始。以前嘅電影都係神秘,但今次我跪地哀求雄叔叔,希望可以做一套高透明度嘅電影.....
網友現場探班、邊拍邊問直播問大家劇情決定、直播鄧麗欣現場萬歲、幫鄧月平LIVE收兵、陳凱琳親手打218 5個0甚至係游學修同林耀聲真人即慶再次打茄輪等等嘅建議,
但我唔會氣餒,我會一直哀求落去,直到佢答應我為止。
我會一直報導我嘅爽皮時刻,希望大家一路留意「起底組」。
記住,鍵盤出動,人人英雄。
個slogan係我諗,是咪好有型?