【明報專訊】噚日愚人節，好多公司都喺facebook出帖應節。其中香港航空一踏入4月1日就「宣布」會喺機艙座位加設「氹你個仔制（掣）」，話乘客一撳掣，就有打扮奇幻嘅空姐空少登場，𧨾你個仔仔囡囡，包保小朋友即刻唔扭計。有網民留言話，噚日喺香港等上機時，真係遇上空少帶住扭蛋同小朋友玩，香港航空留言回覆話派蛋係「一日限定」；亦有網民搞笑話，自己個仔廿幾歲，搭親飛機都喊，問有冇刺激啲嘅玩意。
城巴噚日亦有份「惡搞」，話2098年啟用全港首架「雙層核能巴士」，利用重氫（氘和氚）嘅核聚變微反應堆，可以為車輛輸出17萬匹馬力。另邊廂，九巴亦話「熱狗巴士」復活，團費每位收4.1元，路程途經全港最高溫嘅上水及大美督，亦有得食自家製嘅「九巴熱狗」。
宜家自導自演 預熱「番茄炒蛋」
宜家家居（IKEA）上周四已為愚人節埋下伏線，喺網上貼咗張番茄炒蛋飯相，第二日就刪相，並出道歉聲明話有編輯「誤用」公司帳號貼住家飯。到噚日先至「真相大白」，IKEA話整咗味「潮州凍食」番茄炒蛋扭紋新地筒，畀大家感受吓家嘅味道。唔少人噚日喺門市買到，亦有人留言話「爭咁啲葱花」。