一年容易又過年，打開電視，總係會有啲「老是常出現」，但係點都睇唔厭嘅賀歲片。
登入 瀏覽本網站，可獲取積分換領專屬優惠
點擊查看專屬優惠
星爺系列
每逢過年，電視台電影台一定係播得最多星爺嘅戲，尤其係《家有囍事》嘅重播頻率最高。梗係啦，又有咁多巨星撐場，又好笑，又好意頭喎！「巴黎鐵塔反轉再反轉」，「無定向喪心病狂全身機能失調症」呢啲對白睇幾多次都係會笑得出！
《逃學威龍3之龍過雞年》都係經典之一，雖然劇情唔同之前嗰2集，但係都不乏無厘頭搞笑場面！
雖然星爺喺《行運一條龍》只係客串性質，不過我諗大部分人都只會記得「咩話，年初四咁嘅樣？」呢句對白。
其實90年代每年賀歲檔期，幾乎都有星爺嘅作品上映，實有幾句對白你聽得明，你噏得出，就好似《破壞之王》、《97家有囍事》、《喜劇之王》，套套都係經典，年年都播。
00後賀歲片
雖然2000年後嘅港產賀歲片冇以前咁輝煌，但係都數得出幾套好睇，而且都係過年期間重播次數好高嘅作品。就好似《嚦咕嚦咕新年財》。過年唔打牌，做咩呢？華仔同青雲嘅搞笑演出、梁詠琪嘅爆炸頭造型，仲有奶奶嘅「好彩我兩個仔有一個生性」、「我要同我個仔報仇」都係為人津津樂道嘅場面。
另外又點可以唔提及《行運超人》呢？鄭中基扮女人一幕堪稱爆笑場面經典！
講到近幾年嘅賀歲片，《七十二家租客》都幾有睇頭㗎！TVB藝員總動員、多位歌手助陣、還原旺角西洋菜街嘅場景，有曬賀歲片元素，夠熱鬧！
2003年《百年好合》有票房保證Sammi同古天樂，拍住上。相信「自從峨嵋山上見到你，我好想飛鵝山上見翻你」有好多人都識唱。
懷舊經典
有冇人鐘意懷舊？1982年嘅《最佳拍檔》可以話係賀歲片鼻祖，當年票房已經大收二千幾萬，而且有第一代歌神許冠傑做主角。有啲演員可能你直頭聽都未聽過！
《富貴逼人》系列都係值得一睇再睇嘅賀歲片。
不得不提《東成西就》，真係無厘頭得嚟又好好笑。將王家衛《東邪西毒》嘅原班人馬再拍多套喜劇，張學友唱「我愛你」拍住朝偉嘅鴨仔孖潤腸又係一絕！
唔知大家又鐘意睇邊套呢？