樂在當下 趙金卿
眼前的趙金卿(Kathy)，曾幾何時是穿梭Ball場的風頭躉，名字亦經常出現於各大報章雜誌的娛樂版上。不過，近年她卻甚少現身公開場合，只會為了工作和慈善才偶爾露面，閒時更貫徹其「讀萬卷書不如行萬里路」的宗旨。
「我o依家六十七歲嘞！已經做咗人嫲嫲，當然要趁自己仲行得走得，同朋友周圍去見識吓啦！Ball場我仲有去，不過o依家我會揀，唔會好似以前咁，好多時我都會行後門出入，因為我真係怕咗，唔想畀人指指點點，而且我又唔需要見報，所以影唔影相對我都無所謂，我只係支持朋友。」
人生每個階段，所求總有不同，只要活在當下，及時行樂，便是精采人生。
近年甚少做訪問的Kathy，拍攝時表現得十分不自然，不停笑說：「我隻手點擺好呀？插袋定唔插袋呀？」
Kathy（中）今年與一眾朋友到日本東京補祝生日，獲好友日本前國腳中田英壽（左）突然現身，與她一起切蛋糕，令她開心不已。
遊世界
跟Kathy相約了大半年，終於可在她位於中環干諾道中頂層連天台的辦公室，進行是次訪問。現時她為「盈泰投資集團」主席，她還涉獵金融投資、珠寶及酒業等生意範疇，百足咁多爪。
向來甚懂享受的Kathy，將辦公室打造成另一個家，放滿中國特色佈置和傢俬，她笑說：「好多朋友都鍾意嚟我呢度開會同開party，因為呢度咩到有，有紅酒又有雪茄，鍾意講咩就講咩，夠晒private。因為我o依家真係好怕（曝光），所以你見我訪問都好少，今次我諗都係我最後一次啦！」
談到昔日愛去Ball場的她，忽然「消失」，當事人即解說：「我唔係唔去，只係少咗好多！一來我已經一把年紀，要對自己嘅健康負責，o依家我嘅生活習慣係早睡早起，所以你問我蘭桂坊有咩新嘢，我真係唔知o架！我唔想再畀任何報導影響，所以o依家就算我去Ball，都係行後門。我將自己的時間安排得好好，50%工作，30%做慈善，20%去旅行，享受人生。」
講到旅遊，於剛過去的農曆新年，Kathy就被好友、日本前國腳中田英壽邀請到日本東京，參加當地的清酒節，品嘗超過數十萬種不同味道的清酒。「平時去旅行，我滴酒不沾，因為萬一我出咗咩事，朋友送我去醫院，佢哋都未必識得溝通，為免有不愉快嘅事發生，所以自己一定要自律。不過，今次就唔怕啦！有中田英壽喺度，始終佢係當地人，有咩事都無咁驚。」
經常周遊列國的Kathy，去年的古巴之行令她記憶猶新，「嗰次去到適逢係古巴嘅雪茄節，我又係一個喜歡食雪茄嘅人，當然要親手試吓整啦！點知工序好複雜，我做到一支咋，出嚟嘅效果當然⋯⋯唔好提啦！不過過程就難忘同特別，當地冇我想像中咁落後，相信將來佢開放咗之後，一定會發展得好快。」
談到所到過最有特色的地方，Kathy坦言為位於鹿兒島南面的屋久島，「呢個地方真係好值得推介，佢哋冇廟宇，因為當地人相信樹木就係神，而且仲冇車冇超級市場，所有蔬菜生果都係放喺一間木屋入面，啲人想買就自動自覺擺錢入錢箱。當地住咗好多老人家，而且啲人又唔會賣屋，因為佢哋相信自己嘅子孫雖然去咗大城市做嘢，但係佢哋總會有一日會返嚟。呢個地方亦都係行山嘅好地方，我下次會再去。」
Kathy還稱，下一個目的地是南非，「我打算今年七月去睇動物大遷徙，啲動物一群一群嘅場面，非常壯觀。」
去年到古巴旅遊，Kathy最難忘親手自製雪茄的場面。她還購買了不少古巴最好的雪茄回港送贈給朋友和自己品嚐。
