想買平機票／酒店 ? 旅行高手才懂的 3 大「黃金時間」 秘密

好多人都覺得買機票，一定係提早買最著數，因為通常都會有平機票。這個講法其實某程度上是對的，但早幾多先為之「抵」？筆者最怕就是買完之後無耐又有更平機票出現，個下「揼心」feel 真係好鬼灰。不過近年筆者都開始捉到少少路，而家就同大家分享 5 個窮遊買機票要注意的貼士啦！

秘密一：中午 1：00 訂票最多可平 18%

相信多數香港人(包括小編)，都是放工後睡前才有空上網預訂酒店及機票，但其實根據旅遊網站 KAYAK.com.hk 的資料顯示，下午 1 點係機票最抵買的時間，比最昂貴的時間足足平了 18%！都好合理，因為呢個時間好多人都係等緊位食 lunch，邊有時間去睇機票呀。

秘密二：

去／回程日子節扣各有不同，平貴最多差 79%

相信唔少人都會考慮番完一個星期工，然後揀星期六出發去旅行（尤其是五天工作周的打工仔），因為這樣就可以省回兩日大假 quota。不過你係咁諗，個個都係咁諗，咁機票又點會平呢？其實出發日期最好避免揀星期六、日（如長途機最好亦不要選星期五晚上航班），回程亦盡量不選星期日，因為平機票通常都不會在這些日子出現。以下就讓筆者同大家分享一下港人最愛的 10 大短途及長途機外遊城市的最佳出發及回程日子吧。

短途 10 大熱門地點

城市 出發最佳 回程最佳 節省高達（相比最昂貴月份）

首爾 星期五 星期五 75%
東京 星期三 星期三 76%
曼谷 星期五 星期三 42%
大阪 星期二 星期日 63%
布吉 星期六 星期五 17%
台北 星期四 星期四 46%
新加坡 星期二 星期二 79%
可倫坡 星期五 星期一 19%
馬尼拉 星期三 星期五 57%
登巴薩 星期一 星期五 22%

長途 10 大熱門地點

城市 出發最佳 回程最佳 節省高達（相比最昂貴月份）

洛杉磯 星期三 星期三 39%
倫敦 星期一 星期一 46%
巴黎 星期四 星期六 62%
奧克蘭 星期五 星期日 58%
悉尼 星期五 星期五 65%
三藩市 星期四 星期四 27%
紐約 星期一 星期一 31%
布里斯本 星期三 星期三 8%
溫哥華 星期五 星期五 13%
阿姆斯特丹 星期二 星期二 21%

秘密三：

最近出發日的預訂優惠 deadline

每個人都想最後一刻才 book 機票旅店，因為怕行程有變，可是日子越近越貴，亦可能 full 爆無位。 有時預早太多，又未知自己／朋友批不批到假期，最唔抵就是有時提早一年同提早三個月的優格差不多(有時可能更便宜) 。到底如何捕捉「最近出發日的優惠期 deadline 」呢？

如果是短途的話，一般最好都預早 2 至 3 個月訂機票；但如果是飛長途的話，最少提早 3 個月訂機票有些城市，例如：溫哥華，如果要買平機票，隨時要提早差唔多成年，先可以比最貴個時平 10% 左右，這一點大家就要留意了。同樣地，筆者用 10 大港人最愛的長、短途城市，為大家介紹最佳提早預訂機票的時機啦！

短途 10 大熱門地點

城市 最少提前多少月預訂才抵？

首爾 1 個月
東京 2 個月
曼谷 3 個月
大阪 3 個月
布吉 6 個月
台北 2 個月
新加坡 2 個月
可倫坡 4 個月
馬尼拉 7 個月
登巴薩 5 個月

長途 10 大熱門地點

城市 最少提前多少月預訂才抵？

洛杉磯 2 個月
倫敦 3 個月
巴黎 3 個月
奧克蘭 4 個月
悉尼 8 個月
三藩市 2 個月
紐約 3 個月
布里斯本 3 個月
溫哥華 11 個月
阿姆斯特丹 3 個月

秘密四:

廉航平於表面..

好多人訂機票，近年都有考慮廉航，尤其是去東南亞國家就更加，因為帳面上廉航每張機票都好平，以香港快運為例，之前就做過一程機票只是 $32，以飛日本大阪為例計埋稅來回都只是 $500 左右，真係幾抵！不過大家要記住啦，搭廉航唔係對個個人都係抵架！如果你有以下「外遊症候群」徵狀，就建議大家唔好考慮廉航了，因為計埋計埋各項雜費、附加費，隨時仲貴過你買張普通航空公司的優惠機票呀！

• 購物狂，總之有錢或 credit card 在手就買個不停，好似想搬曬人哋成間舖番香港咁

• 有潔癖，一日隨時要換兩、三套衫，或者要帶幾對鞋旅行

• 成日都要食，搭飛機就算唔食飛機餐，但無啲嘢落肚會好唔自在

• 極度怕悶，上飛機點都要睇番一套半套戲，睇少陣都唔得

• 死都要揀位，如果坐到唔啱心水位置（例如：windows seat、windows-asile 位）會極度唔 happy

當然，如果你已習慣窮遊或者背包遊，都無乜嘢要寄艙，一個背囊幾件衫加啲個人物品就飛得，咁搭廉航真係最抵玩嘅！

▲搭廉航帳面係平，但如果計埋行李、飛機餐，加埋稅同雜費，真係未必會平得過普通航空公司架！

秘密 4 (sorry 呢個不是秘密)

留意各大旅遊網站 + 社交平台

最後一點，當然是留意各大旅遊網站及社交平台啦，前者例如：KAYAK.com.hk、Expedia 等，以及各大航空公司的特價機票網站，例如：國泰 + 港龍的 Fanfares。另外，平時在 Facebook 都會間唔時見到各大航空公司提供的特價機票廣告或 newsfeed，多啲留意，一有啱自己的特價機票就睇啱時間 F5 搶，咁就自然可以遊得輕鬆兼抵玩啦！

▲講傳統航空公司，其實每星期二透過國泰 / 港龍的 Fanfares 網站搶平飛，已成為唔少 budget travelers 的常做事項。

▲當然有些航空公司的官網，都會不定期推出優惠俾大家搶購的。

▲如果唔想煩，有些整合訂機票、酒店及租車的旅遊網站，都會提供去各大城市的特惠機票 offer 俾大家。

參考資料 : KAYAK.com.hk

• 不想錯過新科技 ? 請 Follow unwire.hk FB 專頁 http://facebook.com/unwirehk/

The post 想買平機票／酒店 ? 旅行高手才懂的 3 大「黃金時間」 秘密 appeared first on UNWIRE.HK 流動科技生活.