香港童星Elkie莊錠欣於韓國出道，成為CLC女團嘅成員，又出碟又拍韓劇，成績唔錯，韓國觀眾仲好鍾意Elkie喺《富家公子》嘅演出，真係好替Elkie開心啊！20歲Elkie細細個開始就接觸演藝興趣，又學唱歌、跳舞，後來仲做埋大台童星，打造韓星夢，人仔細細已經有咁唔錯嘅成績，真係好唔容易。
登入 瀏覽本網站，可獲取積分換領專屬優惠
點擊查看專屬優惠
大家都知Elkie係TVB童星出身，但原來佢成為童星之前，就加入過薛家燕旗下少女組合Honey Bees，細細個已經要上台表演同面對鏡頭，認真唔簡單啊。
而後來Elkie就參演過好多電視劇，例如《怒火街頭》、《公主嫁到》、《老表，你好hea》等等⋯⋯好多套作品都令人印象好深刻，正正係因為佢自然演技加上清純可愛嘅樣子，深得觀眾喜愛架。
Elkie拍攝《On Call 36小時》而認識到馬國明，馬明仲不時大讚Elkie又乖又有禮貌。
原來Elkie想成為韓星都係因為佢嘅偶像李敏鎬：「我好鍾意少女時代，覺得她們不但只靚女，仲唱得跳得，睇佢哋表演就會充滿力量，好羨慕啊。最鍾意嘅韓劇係《繼承者們》，好鍾意李敏鎬，亦好欣賞朴信惠嘅演技。」
女大十八變係真係無講錯架，Elkie愈大愈靚女，而家仲係唔少宅男心中嘅女神。最近Elkie回歸返香港做評審，佢就話因為行程太趕，今次未夠時間去見朋友，但係都有抽時間去海傍行下。
今次返嚟香港見大家，佢覺得好神奇，後來有班參賽者大跳CLC嘅舞，佢仲感動落淚。
問到佢喺韓國有無整下野袋，佢就自爆話曾經喺宿舍親手煮港式美食俾隊友試：「試過整臘腸炒飯、蒸臘腸同埋港式公仔麵俾隊友食！」
而Elkie喺《富家公子》一劇中嘅亮眼演出，就得到唔少韓劇迷嘅喜愛。劇中Elkie就暗戀金旻奎，但金旻奎就對Elkie表示自己將係最後一次幫佢，以後就各不相干，令莊錠欣露出失望嘅表情，仲對金旻奎講：「夢夢唔想就咁結束！」唔知Elkie同金旻奎嘅感情發展最後係點呢，好期待啊！