消費者訴訟基金　助國泰洩密苦主追索

政商界名人經常選搭嘅國泰航空驚爆洩密風波，九百多萬中外乘客嘅個人資料外洩。有英國律師行擬發起海外集體訴訟行動，根據歐盟《通用數據保障條例》（GDPR）有關「洩露資料帶來不便」嘅理據，向國泰追討賠償，一旦勝訴每人或可獲一千五百英鎊（一萬五千港元）賠償，但本港律師提醒市民委託海外律師索償，成本高昂隨時得不償失。

有法律界人士表示，追索唔一定要去到外國，喺香港向國泰提出民事索償都得，但申索人必需證明有實質嘅經濟損失，「民事索償係以個人名義提出，訴訟費不菲，隨時贏了官司，輸了律師費。」法律界人士指出，其實集體訴訟係最划算，由眾多苦主一齊分擔訟費，只可惜香港並無集體訴訟法。

不過又唔使心灰，消委會嘅「消費者訴訟基金」概念同「集體訴訟」接近，消委會會集合一眾苦主，由最具代表性嘅苦主作代表去打官司，一旦勝訴其他苦主也獲得受理，訴費也能一起分擔。作為今次事件苦主之一嘅消委會總幹事黃鳳嫺表示，佢暫時未有實質經濟損失，未有需要採取法律行動，但呼籲有需要嘅市民，透過該基金尋求法律協助。

國泰自爆洩露九百幾萬名乘客嘅個人資料，黃鳳嫺呼籲有需要嘅市民，向「消費者訴訟基金」求助。