自從4月，黃心穎被踢爆偷食天后人夫許志安之後，形象插水式破產，從此避走美國人間蒸發，不過就有傳佢留喺美國轉行做地產。其實娛樂圈看似精彩，但都唔係個個都撈得掂。咁撈唔掂，又要生活嘅情況下，就冇得唔轉行，不過其實轉行可能撈得更掂，好似以下呢班明星咁！
登入 瀏覽本網站，可獲取積分換領專屬優惠
點擊查看專屬優惠
上位花旦變地產妹：黃心穎
黃心穎喺TVB本來上緊位，啱啱拍好嘅《堅離地愛堅離地》、《丫鬟大聯盟》、《牛下女高音》全部都係女一，點知因為佢所有劇集都危危乎。本來由女一淪落成大茄嘅佢，加上香港網民對佢大為反感，時至今日都仲未平息到怒火，難怪心穎心灰意冷，寧願留喺美國改名Rachel並轉行做地產！
早排因為黃心穎而受影響嘅新劇《牛下女高音》就被安排做台慶劇，但喺近排播緊嘅電視宣傳片入面就接唔多見到黃心穎！
魚蛋皇后：譚小環
譚小環貴為1994年港姐冠軍，當年受歡迎嘅程度絕對可以媲美「四大天王」，但日子耐咗，佢反而漸漸淡出娛樂圈，近幾年，就轉行去咗賣港式地道小食，仲賣到街知巷聞，好好生意，且收入比當演員時仲高！
世界傑出華人：陳妙瑛
同樣係港姐出身嘅陳妙瑛，曾與關詠荷、蔡少芬、宣萱及郭可盈被封為TVB九十年代末「五大花旦」，佢嘅代表作非常之多，《無頭東宮》大家冇睇過都一定有聽過！不過佢都絕對係明星轉行人士之中最成功嘅例子之一喇！陳妙瑛2002年離開TVB之後，建立咗佢嘅健康、飲食、美容事業王國，變身商界女強人，仲曾獲美國加州哈姆斯頓大學頒授榮譽博士學位及世界傑出華人獎，身家唔洗數，都係勁！
前上市公司主席：張玉珊
張玉珊曾經喺TVB演過大大小小劇集，《騙中傳奇》入面嘅刁蠻張寶兒，確實深入民心，而且當年佢可謂靚絕娛樂圈，四大天王嘅MV佢都有出演過，但佢偏偏唔留戀喺娛圈，反而創立美容上市公司，當年幫欣宜減肥，到今時今日都仍然為人津津樂道。現年44歲嘅佢，已經退休享受人生了！
台灣牛肉麵老闆娘：傅珮嘉Maggie
傅珮嘉Maggie係香港著名嘅唱作歌手，10級的鋼琴造藝，歌藝了得，佢首《絕》大家當年去K房必點，可惜事業去到樽頸，難覓突破，所以毅然放低事業出走香港到台北，點知就喺嗰陣邂逅到而家嘅台灣老公，仲將台灣牛肉麵引入香港。
兒童節目主持變生意王：伍文生
文生哥哥喺兒童節目入面最令人印象難忘就係喺短劇中扮演「吱吱鼠」，不過佢冇留戀做兒童節目，05年同圈外女友結婚，一度移民澳洲，近年就回流返香港。而家生意做得好大，分別有餐廳、三文治外賣、3間特許經營權餐廳，仲有婚禮統籌服務公司，可謂八足咁多爪！
生煎包王子：蕭潤邦Oscar
曾經喺樂壇都叫做過下歌手嘅蕭潤邦，大家可能唔記得佢唱過乜歌，但就一定記得佢間生煎包！當年樂壇開始冇咁蓬勃，養唔到好多歌手，而蕭潤邦冇做歌手就離開香港去上海，由低做起學整生煎包。冇人工學師兩年，由搬麵粉，到搓麵粉，真係落手落腳做生煎包，難怪今時今日賣到風山水起，成行成市，短短9年已經喺香港擁有五間分店，仲娶到個靚老婆返嚟！
名店Sales：劉思惠
英皇前小花——3T成員劉思惠Maggie，比起其他兩位成員Yumiko和Mandy蔣雅文嘅發展冇咁理想，索性退出娛圈做個平凡人。跟英皇解約後曾跟友人與尖沙咀開設時裝店，但已結業，後來又去中環名牌鞋店做sales，不過而家嘅佢已經結婚生仔，一家三口十分溫馨。
明星御用瑜伽老師：鍾麗淇
鍾麗淇90年代活躍TVB，佢拍過嘅《刑事偵緝檔案III》、《鑑證實錄》等等都係經典，不過2004年後就轉行做瑜伽老師，好多名人明星都跟佢學做yoga，非常出名！近年就結咗婚，仲生咗兩個女女，回歸平淡。
保險高層再開車仔麵店：鄧一君
童星出身嘅鄧一君大家一定睇過佢嘅電影，包括《縱橫四海》、《記得...香蕉成熟時》又或者電視劇《美味天王》、《烈火雄心》、《金裝四大才子》等等，絕對係深入民心！不過可能因為太早成名，之後一直冇突破，加上一張娃娃臉導致成年後戲路太窄，一直紅唔起。29歲就決定退出娛樂圈後繼續學習，唔單止拿到了碩士學位，仲完成咗財務策劃師嘅課程，轉戰保險業！短短十一年間他已擢升為高級財務策劃師兼分行經理，如今仲投資開車仔麵店，有妻有女有事業，幸福滿瀉。