財女買樓「置」安心

Kristy素來與父母及三兄弟姊妹同住馬鞍山居屋單位，她表示，「讀大學嗰陣已經成日睇財經版，又鍾意睇睇樓節目，見到人哋啲樓咁靚，自己都心郁郁想擁有物業！女仔天生又鍾意買衫，真係唔夠位擺嘢，人大咗又更想有私人空間。」

夥拍妹妹 520萬上車

因此，Kristy與有着相同理念、同樣是金融人的妹妹聯名買入同區盤迎海三期，望內園景、實用面積490餘呎，售價約520萬元的單位，一圓上車夢。

金融人表面風光，惟她的職業竟一度成為她的置業障礙。她稱，由於理財顧問收入主要來自表現費，導致每月收入頗不穩定，所以銀行須收緊其物業的按揭成數，要求提高首期銀碼。她與家人商量後，父親出手相助，最後敍做約六成按揭，望紓緩姊妹二人日後每月的供樓壓力。

上車的機會總非唾手可得，當不少年輕人仍過着「月光族」生活，時任理財顧問的Kristy早於學生時期已開始發「上車夢」。她大學時期任兼職記者，因緣際會認識了熟悉樓市的朋友，初諳置業好處，便更努力工作儲錢密謀上車，同步任職補習老師密密吸金，「當時入息唔多，只係幾千、幾千（蚊）咁儲，其後多次抽新股短炒都屢有斬獲。」

投資藍籌股 賺夠即走

她甫畢業便實行慳家月供基金大計，「初出茅廬月入得萬幾蚊，咪諗辦法節衣縮食，出街只會食茶記，好少睇戲，最初三年冇去過旅行，每月堅持進行月薪三分法，一份做日常使費、一份存銀行應急、一份做長期不動產，不動產嗰邊一半攞嚟月供基金、一半儲Cash（現金）放入另一個銀行戶口。」

短短數年她已滾存一筆可觀資金，為尋求更豐厚而穩定的回報，遂開始中長線投資藍籌股，另有涉獵外匯投資。「揀藍籌股係因為市況正常嘅情況下，理論上上升嘅機會較大，仲相對穩陣，坐艇風險冇咁大，投資策略係揸半年至一年，賺幅達標即走貨，唔會長揸！每年投資目標各異，早幾年樓市升勢強勁，會揸多啲地產股，舊年起就主力持有大型保險股。」

她留意到，藍籌股普遍在每年年中淡市時，往往股價會處於較低的水平，故會力求靜候「筍價」入貨，不會貿然出手。

儲定銀彈 自住唔怕蝕

每個人心目中的Dream House（理想居所）不盡相同，卻同樣面對香港樓價高企的難題。她認為，年輕人如果希望買樓應該先盡力儲銀彈，當樓價回落或遇上合適入市時機，最緊要手頭上有一筆資金用作首期，若將責任推諉於在港上車難而不計劃將來，日後的置業路只會愈來愈難行，機會只會留給有準備的人！

不過，是次始終是她首次置業，難免緊張，買入時更曾擔心會否摸頂，誰不知該單位樓價曾觸及700萬元，惟Kristy指，置業用途為自住，故短時間內不會考慮會否蝕價，目前即將收樓，與妹妹頗期待。展望未來，她在未來一至兩年亦希望進身「包租婆」行列，現正積極搏殺，努力儲定銀彈，顧及樓價回落，靜候入市時機。

追求財政獨立

「先買樓後結婚，不買樓不結婚」是香港新一代的婚姻觀念，黃安盈對此抱着另一套詮釋方法。她甜絲絲地說，若可與另一半一齊走到人生下一階段，雙方人生及理財價值觀應大致相同，雖然個人熱愛物業投資，惟未必會要求另一半有樓，幸而任職職業投資者的男友不抗拒相關投資，現時更一起計劃日後共同擁有一所物業。

拍拖講心亦講樓

對於拍拖，生活實際的她寧缺勿濫，因此減省不少支出。她更透露，前度男友與她因價值觀有異而分開，「佢會想成日見，出街食飯要食好啲，理財觀好唔同，易有爭執」；反而，現時與現任男友工作繁重，一周只見一、兩次，拍拖以「多傾偈、少消費」為主，笑言「有情飲水飽」，可見價值觀一致的重要性。

女性當自強，她與妹妹想法相同：「無論第日有冇另一半都好，女仔始終要財政獨立，一定要有樓，而唔係嫁唔出先買姑婆屋！我諗法傳統，總要有層樓在手先有安全感，始終香港地少人多，物業需求大，加上日後若組織小家庭，就需要穩定居所，以理財投資角度出發，既然要畀錢租，點解唔畀錢買？」