Facebook

【#昔日回憶】笑中有淚 王菲經典電影《天下無雙》

最近睇深夜重播嘅《原振俠》，諗起一套由王菲主演嘅電影都好值得推介，就係2002年上映嘅《天下無雙》，電影由王家衛監製，劉鎮偉執導（即係《西遊記第壹佰零壹回之月光寶盒》裡面嘅菩提老祖）。

電影講述大明正德皇帝（張震飾）同無雙長公主（王菲飾）厭倦咗皇宮嘅生活，計劃逃出宮中，最後卻只有無雙成功出走，男扮女裝去咗梅龍鎮遇到小霸王阿龍（梁朝偉飾）同鳳姐（趙薇飾）兩兄妹，阿龍同無雙二人互相產生好感。不久後正德皇帝都嚟到梅龍鎮，仲同鳳姐發生感情，二人之事驚動咗太后，要將呢兩對小情人分開。正德皇帝通過咗愛情試練，阿龍卻無法通過，只能同無雙分開。套戲嘅情節非常有趣，由其是張震飾演嘅皇帝經常靠住「演技」嚟氹佢身邊嘅人聽佢嘅支笛，仲「食軟飯」食到津津有味。

到最後無雙同阿龍喺桃花樹下重遇，呢個時候嘅無雙已經癲咗，當咁自己係阿龍，不停重複以往阿龍嘅說話。不過一切對阿龍都唔再重要，佢認為「有時候愛一個人愛得太深，人會醉，而恨得太久，心又容易碎。」、「我終於明白，鏡花水月是咩意思，其實情之所至，應該你中有我，我中有你。邊個係男邊個係女，有什麼關係呢？」箇中對愛情嘅睇法非常發人深省。王菲仲憑此片獲得第9屆香港電影評論學會大獎最佳女演員。