余香凝於2020底與圈外男友陸政渡結婚，翌年誕下女兒Clare，今年4月報喜，宣布懷上第二胎，並喺30歲生日當日公開第二胎性別，成功湊夠一個「好」字，今日喺IG貼出一家四口手疊手嘅合照，宣布兒子出世啦！

余香凝受訪時表示生第二胎心情冇咁緊張，一路做手術有同醫生及先生傾偈，今次陀第二胎冇勉強自己係咁進食，余香凝開心見阿仔健康：「又成功上咗奶，對一個餵母乳嘅媽媽非常感動。今次先生比上次喊得犀利，疫情過咗可以即刻抱，平日先生啲情緒比較收歛，即刻叫護士拍片影低佢。」

余香凝喺IG貼出「全家福」並開心大女初次見到弟弟時大讚靚仔：「歡迎嚟到我哋呢個家，我哋每一位都好愛你，家姐覺得你好靚，以後佢會成日唱歌畀你聽，你成日都會聽到let it go同a whole new world。」余香凝亦感謝細仔好錫媽咪，成個懷孕期都好舒服，阿仔出世7.7磅，Ｂ仔又好多頭髮又叻仔，希望阿仔飲多啲奶、訓多啲，快高長大！

余香凝喺IG Story貼出抱着阿仔嘅照片：「第二次做媽媽，以為自己會好好珍惜係醫院有得瞓嘅時間，點知最後都係堅持夜晚都推入嚟試埋身，最後家姐同細佬一樣叻叻！3日搞掂！」

#余香凝 #陸政渡 #第二胎 #母乳 #全家福 #兒子