【明報專訊】本港盛事連連，下個月就係「藝術三月」，文化體育及旅遊局長楊潤雄噚日話嚟緊3月會喺唔同時間免費派發雪糕、請市民同旅客搭電車同天星小輪，以配合宣傳「藝術三月」各項活動，鼓勵大眾參與，當局會喺下個月陸續公布詳情。
「ComplexCon」首度衝出美國
楊潤雄噚日出席「藝術三月2024」啟動禮致辭時話，局方首次以「藝術三月」品牌串連推廣由政府舉辦、資助或支持嘅文化藝術盛事，當中包括多項藝術展演、影視盛會、文化峰會同時裝表演等，吸引唔同年紀、背景嘅人參與。
Emily睇過啲活動，發現除咗有以往都好受歡迎嘅「巴塞爾藝術展」同「Art Central」外，備受全球矚目嘅潮流藝術文化盛事「ComplexCon」仲會首次衝出美國喺香港舉行。
楊潤雄盼令大眾有更深印象
楊潤雄話今次活動希望發揮藝術盛事嘅「最大經濟效益」，鼓勵旅遊、酒店、零售、餐飲業等相關行業，聯同文化藝術業界合作，一齊打造「藝術三月」品牌，令大眾對每年3月香港嘅文化藝術氛圍有更深刻嘅印象同感受。
相關字詞﹕Art Central 巴塞爾藝術展 楊潤雄 藝術三月