以下係由網友提供嘅親身經歷, 好多人最怕係自己家人加入直銷, 唔好以為呢啲嘢唔會發生喺自己身上。 唔想身邊嘅親朋戚友中招, 最好嘅方法就係喺佢哋接觸直銷公司之前, 先將案例share出去:
<加入直銷公司 父親向財仔借貸 不顧家中妻幼>
我先生俾間直銷公司洗左腦,公司係旺角亞皆老街附近,叫「明昇集團有限公司」,由佢一位貴人帶佢入去。我上網睇過資料, 相信呢間就係直銷公司 “亮碧思”, 見到好多有問題嘅例子, 有同佢講但係佢唔理, 因認為個貴人係幫佢搵錢, 唔會呃佢。
我先生俾左$5000買貨,另外$210年費。 產品包括紅酒ESTEBEL (since 1833), 香水,保健產品,化妝品,精油都有,全部標榜法國貨。我睇過佢公司筆記教導, 產品都係公司既靈魂,所有產品都唔會係市面上搵到,供應商只供應公司代理所以公司唔需要廣告及宣傳。筆記有句說話出現過好幾次: “聽話照做,公司有非常完善既系統,可以助你地一步一步咁升,唔需要任何學歷,所有工作由零開始,會有好多專業人士同埋團隊教你,唔好將生意諗得咁複雜,越簡單越容易成功。”
我先生幾乎每日浪費最少5,6個鐘去聽洗腦堂, 仲話如果可行就想辭而家份工,入去亮碧思全職做。當時我只係想佢迷途知返, 要求佢未搵到5萬之前唔好再投資更多嘅錢,嗰時佢口頭上應承咗我。 我畀網上嘅資料佢睇, 佢就話“網上講既野一定係真?你又未了解過間公司!” 仲話即使我要同佢離婚,佢都會堅持去做。 佢每日早出晚歸,同我好少溝通, 我知道愈反對,佢既思想會越偏激,更加想威俾我睇佢唔係俾人呃,所以我冇再話佢, 反正講佢又唔聽又怕影響感情。見我講少咗, 佢就開始係咁同我講喺公司識左好多人, D人本身每月搵一萬幾千,但依家搵十幾萬一個月。當初承諾過叫我畀兩個月去證明佢嘅成功, 突然反口話需要半年。問佢每日上堂聽乜野,又答我唔到, 又一毫子都未搵到。 我覺得自己已經盡咗力幫佢, 但一啲用都冇。平時我要返工,收工返屋企要湊小朋友,而佢作為我另一半沒有分擔之餘,好似更不斷增添我既煩惱, 我覺得好無助, 所以暫時搬左返去同媽媽住。後來佢游說我搬返去同佢住,承諾自己搵到錢先會做呢間公司,後來帶佢入會既貴人因自己差一個38的下線才能夠升41,借用我先生的身分買單,誘導佢再次加入傳銷。
跟住我最擔心嘅事終於發生: 我先生俾上線焗佢借財仔六萬三千蚊, 但佢依然覺得自己冇畀人呃, 想去借錢, 違背咗當初 “未賺到錢之前唔會再投資”嘅承諾。喺網上都見過間公司上線叫人借財仔投資嘅個案, 但原來佢公司合約上好謹慎, 白紙黑字寫到明 “閣下應因應閣下的經濟條件而作出適當的資金投放。FRANCINE勸喻閣下不應以借貸方式籌集營運資金, 獨立經銷商不得鼓勵或游說新加盟之獨立經銷商為任何目的向財務機構借貸。” 令借錢呢件事同公司釐清關係。
見佢中毒愈來愈深, 又話要借錢, 我怕將來要幫佢分擔一半既債務。為咗同小朋友嘅將來, 我決定離婚。但係我先生唔肯同我一齊交表,拖住我, 仲要不斷叫我借錢俾佢,想用我既名義問銀行借貸,我當然唔會咁做。 而家嘅狀況係, 佢借左錢, 搬左返佢媽度住。唔肯同我簽紙離婚, 而且一蚊贍養費都唔俾, 我支出太大負擔唔到, 要搬細屋, 獨力照顧小朋友。 我將件事講出嚟, 係希望多啲人睇到我嘅例子, 可以小心啲, 歡迎大家廣傳出去。