上年多套荷里活電影成為熱話，Marvel 嘅《復仇者聯盟3：無限之戰》同埋《黑豹》掀超英片熱，Lady Gaga處女主演作《星夢情深》亦叫好叫座，咁今年有咩好睇？北美大型票務網Fandango近日就搵咗影迷出手，投選今年十套最期待大片，快啲Bookmark定啦！
登入 瀏覽本網站，可獲取積分換領專屬優惠
點擊查看專屬優惠
1.《復仇者聯盟4》Avengers: Endgame — 上映日期：5月2日
今年最令北美影迷期待嘅就係《復仇者聯盟4》（暫名）！漫威粉絲由2008年嘅《鐵甲奇俠》開始睇足咁多年，終於等到系列結局，到底上集化灰嘅超英翻唔翻生？
美國隊長同黑寡婦搵咩方法對付「魁隆」？
前者會唔會未同「鐵甲奇俠」和好就齊齊死？
「Marvel隊長」有幾好揪？等足11年就嚟有答案，當然恨睇啦！
2.《Marvel隊長》Captain Marvel—上映日期：3月7日
第二位最期待大片都係漫威嘅話題作，就係今年最先出爐，3月就有得睇嘅《Marvel隊長》，漫威第一部主打女超英嘅作品，個角色仲可能有「一個救全家」嘅能力，而且由奧斯卡影后Brie Larson擔正，又有型男Jude Law，故事、角色同埋演員都勁吸引！
而且電影仲係介紹「Marvel隊長」出場，鋪墊佢現身《復仇者聯盟4》，號召力當然Double Up啦！
3. 《星球大戰9》Star Wars: Episode IX—12月20日(北美映期,香港有待落實)
今年呢個十套最期待大片排行榜之中，有7套電影都係屬於迪士尼，堅到不得了！事關唔止超英片，今年仲有《星球大戰9》出爐，前作講到「天行者」出手幫反抗軍，但絕地一戰先叫險勝，今集要同「逐漸變黑」直到幾乎黑晒嘅「Kylo Ren」終極對決，相信情勢更加危急！
另外，三大元老級主角之一嘅「莉亞公主」Carrie Fisher大前年突然離世，無法完成《星戰9》嘅拍攝工作。
導演J.J Abrams最後決定用上前兩集拍落嘅片段令佢「回歸」，令Carrie完滿告別星戰迷，相信唔少粉絲都要入場支持「莉亞公主」嘅「遺作」！
4.《蜘蛛俠：決戰千里》Spider-Man: Far From Home—7月5日（北美映期，香港有待落實）
迪士尼同Sony合作嘅《蜘蛛俠：決戰千里》都係超英迷今年相當恨睇嘅作品。
雖然一睇就知主角Tom Holland於《復仇者聯盟3：無限之戰》唔死得先拍到呢部，但粉絲應該都好想知佢離開「鐵甲奇俠」照顧下點樣單拖（或者有其他幫手？）解難
仲要今集個奸角「Mysterio」係曾傳有機會演「蝙蝠俠」嘅型男Jake Gyllenhaal，而且索爆「梅姨」Marisa Tomei又再出場，點可以唔睇？
5.《反斗奇兵4》Toy Story 4—上映日期：6月20日
迪士尼今年仲有經典動畫系列《反斗奇兵》拍到第4集，正當人人以為2010年拍第3集拍到玩具主人「Andy」上大學，令齊齊成長嘅粉絲爆喊，已經係個圓滿系列結局啦？
點知迪士尼近年驚喜宣布再拍第4集，就算劇本出問題由「胡迪」同「牧羊女」談情，變成新角色「Forky」影響眾玩具嘅生活，粉絲一樣撐場，密密Like爆預告，今集仲有型男奇洛李維斯加盟聲演，又多個噱頭！
6.《異能仨》Glass—上映日期：1月17日
《鬼眼》導演M. Night Shyamalan大前年一部《思．裂》熱爆全城，人人以為講人格分裂嘅小本電影不但令人勁肉緊，仲係大有驚喜，同佢嘅口碑前作《不死劫》有關。
第三部曲《異能仨》今年終於出爐，《不》片嘅「玻璃先生」Samuel L. Jackson到底有咩陰謀？仲有擁有不死之身嘅Bruce Willis同埋人格分裂嘅James McAvoy，故事會被導演扭成點？
7. 《獅子王》The Lion King—上映日期：7月25日
今年仲有幾部由經典動畫拍成嘅電影，當中北美影迷原來比較期待CGI版本嘅《獅子王》！
預告早前一出，粉絲見到小森巴被高舉一幕，配埋勁有集體回憶嘅《Circle of Life》已經好高興，於網上狂派Like。
電影仲係由《魔幻森林》名導Jon Favreau執導，加埋天后Beyonce為「Nala」配音，而且有配樂大師Hans Zimmer出手，質素好有保證！
8.《阿拉丁》Aladdin—上映日期：5月9日
雖然韋史密夫Will Smith之前曝光嘅「燈神精靈」造型藍到出晒事，但耳熟能詳嘅《阿拉丁》被拍成真人版電影仍然好令人期待。
婚禮成日聽到嘅浪漫迪士尼歌曲《A Whole New World》又再於大銀幕播出，仲有英國名導Guy Richie掌鏡，粉絲仍然有信心選佢打入最期待電影排行榜！
9.《小飛象》Dumbo—上映日期：4月18日
一年有3部經典再現，第3部就係《小飛象》，佢嘅話題性在於出自鬼才名導添布頓之手。
卡士包括實力派Michael Keaton同埋Colin Farrell，仲有「添女郎」Eva Green，感覺唔係拍出魔幻氣息，反而會令人以為有怪誕感覺。
點知預告一出就令大批網民對Cute爆「小飛象」狂派心心，似乎想睇添布頓點樣玩！
10.《小丑》Joker—10月4日（北美映期，香港有待落實）
十大排行榜終有套唔係迪士尼嘅作品，仲係漫威對家DC嘅出品，講緊就係性格男星Joaquin Phoenix擔正嘅《小丑》（暫名）獨立電影！Joaquin係圈中出名嘅有料影星，仲曾被斟演漫威「奇異博士」，但最後機緣之下竟然演咗「小丑」！電影故事同《自殺特攻 ：超能暴隊》無關，係講主角點變成「小丑」，相信有唔少內心戲，而電影仲有奧斯卡影帝羅拔迪尼路加盟，又有出色演技睇！