【TOPICK】「黃牛騙局」後姜濤任嘉賓餵薯條 張敬軒大讚姜濤:一直進步
張敬軒近日為紅館演唱會補場,早前曾有黃牛黨傳出姜濤會擔任嘉賓,而昨晚(5月21日)姜濤真的現身軒仔的演唱會,席間姜濤餵軒仔食薯條,軒仔更得戚說:「呢啲福利得我有!」另外軒仔自爆4年前已認識姜濤,大讚姜濤乖仔勤力好學,一早已經「買佢贏」,當中姜濤更獲軒仔加持,睇好他很快開紅館個唱,當中軒仔說:「我相信離你個唱唔遠㗎啦。」
張敬軒演唱會補場昨晚來到第10場,軒仔請來姜濤任嘉賓,姜濤跟ERROR成員梁業低調入場,於台下欣賞軒仔演唱,另外姜媽也來捧場,當見到媒體拍照時,更開心揮手。於嘉賓環節,軒仔介紹姜濤出場。姜濤佩戴卡地亞美洲豹系列鑽石耳環、戒指及項鍊,魅力四射,閃耀紅館舞台。
軒仔直言兩人於4年前已認識,交換電話後有保持聯繫,而姜濤予他感覺是怕醜仔一名,但不時詢問他關於唱歌、音樂的問題,每當有剛拍好的MV和錄好的新歌,姜濤都會給軒仔聽,希望前輩給予意見。軒仔對姜濤讚不絕口:「佢一路未停止過令自己進步,我覺得佢好叻,佢有齊鬥志,亦懂得將勤補拙。我當時回咗佢一個信息,我話:『加油呀,我買你贏!』呢兩年我好開心,佢成為咗獨當一面嘅歌手。」軒仔續稱:「雖然成名路上,要接受各種讚美同批評,喺佢呢個年紀嚟講唔容易,但我相信佢可以勇往直前,成為一個成功歌手,今晚好開心請咗佢嚟同我一齊唱歌!」
在一片歡呼聲下,穿著黑色西裝的姜濤登場,之後兩人合唱一曲《斷點》,唱完歌,軒仔笑姜濤還要那麼害羞,姜B式靦腆即刻出現,不懂回應,只懂得笑住講多謝,繼而定一定神才開口,「我記得前一排有黃牛話我會做嘉賓……嗰時未有我做嘉賓呢件事,我就諗不如將錯就錯……」
軒仔謂幸好姜濤未離港,才可以來支持他,他亦繼續大讚這位後輩,軒仔說:「姜濤真係一個好得意嘅男孩子,每一個同佢合作過嘅前輩都喜歡,因為佢工作用心、又謙厚、又肯學。你一定要加油,你睇今晚現場觀眾歡迎你個聲勢!我相信離你個唱唔遠㗎啦。」
姜濤亦十分有心,知軒仔做演唱會冇啖好食,所以帶了自己最喜歡的食物來作為禮物,捧出「漢堡包及薯條」,軒仔見禮物「嘩」一聲笑出來,「之前好多人送紙製品俾我,終於有啲實用又食得落肚!仲係繼續澱粉質!」姜濤順手執起薯條,送到軒仔嘴邊,「你可以一陣或者演唱會後食……」軒仔大笑,張嘴接過薯條,向現場觀眾笑道:「我真係話你知!呢啲福利得我有!哈哈。」引得不少姜糖及觀眾嘩聲四起,羨慕不已。接著姜濤在觀眾歡呼聲中,再獨唱了《Master Class》。