今晚講喪啲
港產嘅殭屍電影,可謂陪住唔少香港人成長,但係講到關於喪屍嘅電影,就極為罕見,將於六月廿九號上映嘅《今晚打喪屍》,順理成章成為首部同類型作品。
咁有突破,所以我就邀請咗電影嘅幾位女主角:顏卓靈(Cherry)、王敏奕(Venus)、吳家麗,同參與演出嘅灰熊(蘇偉泉)及岑日珈(Angie),擔任今次「Paco巨星飯堂」嘅嘉賓,大講「喪話題」。
我帶五位嘉賓去到位於尖沙咀嘅「Qi-Nine Dragons」,品嘗同電影一樣咁血紅嘅川菜,以充滿「餘韻」嘅麻辣菜式,細說香港首部喪屍電影嘅點滴。
Cherry、家麗姐同Venus(左至右)都係實力與外形兼備嘅女演員,三位喺即將上映嘅電影《今晚打喪屍》中,各展所長,令電影除喪屍以外,更見戲味。
港產片首次
電影改編自本地作家余兒嘅同名小說,以喪屍、末日作主題,喺港產片市場來講,算係一大突破。有份參演嘅Cherry,係戲中飾演打喪屍嘅特別組織成員,「我喺入面有神秘任務,就係同白只、張繼聰同Venus一齊打喪屍,不過喺戲入面我主要係陪住家麗姐飾演嘅姑媽,要到後期先同佢哋會合。
「我對付喪屍嘅武器,唔係好似阿聰同白只嗰啲咁巨型,只係一支好似大哥大咁嘅槍,仲可以用嚟check喪屍嘅能量,都幾得意。我最難忘係一場喺保齡球場拍嘅戲,劇情講我哋三個以為冇喪屍,準備離開保齡球場,點知啲喪屍就喺啲lane嗰度爬出嚟。嗰啲飾演喪屍嘅演員,真係好專業,佢哋喺戲入面啲肢體動作好唔協調,但係咁先最考佢哋嘅四肢協調性,所以我好佩服佢哋。」
飾演Cherry姑媽嘅家麗姐就話:「我喺戲入面係一個粵劇社嘅班主,萬子哥(萬梓良)就飾演我嘅初戀情人,本來嘅理想係做花旦,但係因為意外冇咗隻腳,實現唔到理想。到喪屍病毒爆發嘅時候,阿聰同白只就喺我嘅劇社,拎咗啲道具,去製作打喪屍嘅武器,即係血滴子嗰啲,我覺得都幾得意、幾有趣。
「呢部電影雖然以喪屍做包裝,其實佢帶出嘅主題係,人喺末日,面對危機嘅時候會有咩反應、會做出咩抉擇,用呢啲故事去表達珍惜眼前人嘅訊息。」
我帶Angie、Venus、家麗姐、Cherry同灰熊(左至右),去到位於尖沙咀嘅「Qi-Nine Dragons」,品嘗同電影一樣咁血紅嘅川菜,以充滿「餘韻」嘅麻辣菜式,細說呢部電影嘅點滴。
家麗姐飾演嘅粵劇社班主,係Cherry嘅姑媽,二人喺戲中有唔少對手戲。
兩位男主角白只(左)同張繼聰,戲裏同戲外一樣都係friend底,默契十足。
龍抄手($80),麻辣兼備。
口水雞($85),係以秘製醬汁加本地雞製作,別有風味。
油潑香水魚($350),鮮味嘅桂花魚配上由四川嚟嘅辣椒、香料,特別嘅味道令人回味。
由頭打到尾
另一位女主角Venus,犧牲就比較大。「我喺戲入面飾演被棄婚嘅新娘,所以成套戲都要着住件婚紗打喪屍,因為畀人棄婚,所以我喺戲入面仲癲喪過啲喪屍。而且我仲係一個跆拳道高手,所以我主力係負責武打嘅。不過件婚紗箍得我個胃好緊,所以我唔敢食飯,只係食麵包同埋飲電解質飲品,所以我o依家睇番啲劇照,都覺得自己好瘦。」
飾演喪屍王嘅灰熊話:「我個喪屍王造型,要用三個鐘頭去特技化妝,出嚟個效果好正,不過幫我化嗰啲工作人員就好辛苦。今次好好玩,有一幕講我未變喪屍嘅時候,畀一百隻喪屍追,嗰場戲喺西環拍,好彩拍嗰陣時係Halloween,啲路人都冇咁驚。」
另一位新演員Angie,喺戲中嘅角色甚為特別。「我係白只喺戲中嘅一個imaginary character(想像角色),只會出現喺佢嘅幻想入面,係一個啦啦隊隊長,不停係咁跑。」
Cherry(右)同Venus喺戲中要集中火力對付喪屍,後者仲為部戲減晒磅,以配合戲中造型。
Cherry飾演嘅特別組織成員,對付喪屍並非只靠赤手空拳,而係有秘密武器。
飾演跆拳道高手嘅Venus,整套戲都要身穿婚紗打喪屍,所以佢放飯時只以麵包充飢,為藝術犧牲。
重慶辣子雞($215),精挑無骨嫩雞肉,經油泡後混合麻辣香料,外脆內juicy。
霸王蝦($240)係以新鮮中蝦炮製,麻辣以外仲有淡淡鮮香。
干煸四季豆($110),同樣以四川嘅辣椒製作,辣味獨特。
麻辣更興起
以打喪屍為主題,都預咗電影會血淋淋,加埋情節咁特別,我都好期待。講到血淋淋,唔知一眾嘉賓面對枱上嘅麻辣菜式,會唔會聯想到戲中嘅血腥畫面?家麗姐即時代表say no。「梗係唔會啦!我就好鍾意食辣,直情係無辣不歡!呢啲川菜咁有特色,直情聞到嗰陣麻辣味就想食!」
Venus嗜辣嘅程度,拍得住家麗姐。「我媽咪好拿手整麻辣菜,佢仲特登托人幫佢買菜油,香港冇得賣嗰種油o架,然後磨碎啲花椒再炸,令啲麻味更加突出。我都鍾意煮,但唔係麻辣菜式,只係諗到想煮咩,就喺網上搵recipe咋。」
Cherry就表示:「雖然我唔係好食得辣,但係我好鍾意花椒嗰股麻,會咬爆佢嚟送飯,因為花椒除咗麻,仲有少少鹽味嘅錯覺,用嚟送飯好夾。」
家麗姐係資深「喪粉」,所以佢話可以參與今次演出,佢相當享受拍攝過程。
家麗姐同萬子哥兩大高手,喺戲中大鬥演技。
灰熊喺戲中飾演喪屍王一角,造型十分神秘;而Angie就飾演男主角之一白只嘅幻想人物,全部戲份都要落力拔足逃跑。
薑牛($160),混合甜辣味嘅薄切牛肉,味覺層次豐富。
豆沙鍋餅($108)嘅最大特色,係中間嘅辣味朱古力雪糕,為餐廳獨有配方製作,全港獨有。
Qi-Nine Dragons
地址:九龍尖沙咀北京道12A太子集團中心20樓
電話:2799 8899