月入3萬算得係乜　

從前出黎做野，你生活好簡單，人工萬零蚊，一間房，一張床。最令你感到麻煩的也可能只係門外經常替你擔心嘅長氣老媽子。萬多元的人工雖然不多，但夠使。對你黎講，夠使就係每個月去睇下戲，買兩隻遊戲回家日打夜打，星期六同朋友去名將打下大佬。當年世界好細，但你比較開心。

如今你上了senior級，甚至到了中層，月入三萬多，你嘅世界從以不一樣。你會覺得，M記是「捱」的，同朋友晚飯要搵間坐得舒服的，唔開酒開蠔餐飯點似樣？甚至你開始相信，男人過左30歲仲依賴公共交通工具，是否悲哀？如果你係咁諗，你很有可能是中產病患者。

▲ 月入3萬算得係乜

自以為中產先係致命傷

中產呢個標籤其實好有趣，有人會用財富來界定，有人會用收入來界定，甚至有人會覺得學歷都會係一個影響因素。而所有嘅界定最後尾都要通過最後呢一關，就係你自己覺得自己係唔係一個中產。而呢一個就係最危險嘅地方。

因為覺得自己係中產，所以「咩都咁隨便，點會有人俾面？」但係同時提高咁多個唔同部份嘅開支，而你自己嘅單一收入來源又能唔能夠支撐得起呢？尤其係，如果你需要同未來老婆結婚，你要考慮住屋問題嘅時候，你就會發覺呢三萬蚊係咁卑微。

講到中產數據，我地唔應該睇入息中位數咁低。取而代之就係睇稅局新公佈2016-17年薪俸稅嘅數據。呢個表飛走哂所有唔駛交稅嘅窮人，我地會睇到其實香港要交稅嘅人，最多人係搵緊年薪30萬-50萬，即係３—４萬一個月嗰班，佔總人數28%。就算係所謂「百萬年薪」嘅人中之龍，其實都有十萬人。

所以你搵5萬，你以為自己係中產，都請你好好反省下，自己係咪唔夠努力呢？

中產病患者用價值衡量別人

另外，中產病除左影響自己，仲會影響到人。有一算係，一陣「中產馟」係有啲乞人憎，乞人憎在邊度？就係喜歡用價值嚟度人。最常見就係睇唔起另一半嘅事業。

相信大家身邊唔少例子，30出頭嘅筍盤月入5萬以上，覺得自己係人上人。面對自己另一半打份文職，搵緊萬幾蚊。自己又Plan緊結婚，好多時都會講：「結咗婚你不如唔好做，專心照顧屋企啦！而家份工又要OT，返５日半先搵得萬零蚊！」其實佢自己都唔記得，當年佢仲未上位，仲捱緊嗰陣，都係咁做架咋！

你有你事業嘅追求，點解唔可以尊重下另一半嘅人生呢？係咪搵多3幾萬就大哂呢？好喇！當另一半聽你講，唔做野照顧屋企，又出現另一個問題，就係有中產嘅款，冇中產嘅料。一個人養一頭家。我當過多4-5年，大家有小朋友，月入由５萬升上７萬。有車有樓，好中產！

但係以一個家庭月入7萬，有小朋友，要供樓又要養中嘅家庭嚟，實力係咪支持到你嘅中產生活呢？而你將畢生嘅心力同人事關係都投資係一個單一收入來源，雖然收入亦多，但呢個情況係唔係健康呢？呢點最愛用價值同數字去評價人嘅中產人士應該最清楚不過。

你追求甚麼生活方式

其實我從來都唔認為人應該要咁樣替自己分階級，我反而會用方向來分，就係致富同財務自由。我從來不認為個人搵到咁上下嘅錢就應該要過咁上下嘅生活，所有嘅嘢都必須係因為你喜歡所以先擁有。

例如我買架車返嚟，唔係因為我覺得我應該要有架車，而係我真係中意車。如果你中意嘅嘢，係需要好多金錢去實現，請你努力去發展你的事業，搵多啲錢實現致富。

如果你係希望自己生活上有多啲閒暇，可以做到自己喜歡嘅事，呼吸到自由空氣，你唔需要太多物質上的享受，咁你應該係行財務自由嘅路線，盡早令自己嘅被動收入同儲備蓋自己嘅日常支出，如果你連你兩個方向，都唔知應該行邊樣，其實就算搵幾多萬一個月，你都唔會快樂。

最後仲要記得，搵幾多都好，請尊重別人嘅事業，窮生我從來唔會因為窮太搵錢唔夠我多而睇唔起佢嘅職業，相反我覺得佢嘅專業好有意思，我值得發展。呢個世界唔係搵多幾萬就大哂的，中產兄。

【文章來源：窮家有道；獲作者授權轉載。原題：「恐怖的中產病」】

 

【延伸閱讀】你係邊種窮？對症下藥有得醫

【延伸閱讀】愈窮愈見鬼　點先可以脫貧

 

關於作者：

窮一生，80年代末期出生，背負著香港地所有失敗者的標籤。 單親家庭、公屋仔、母語教育、唔靚仔、冇錢、讀乞食科、從事全香港公認最乞食的行業。 22歲由3萬元的總資產，12K的月薪開始上路，26歲儲到人生第一個100萬。2年後再把這100萬翻倍！ 自小明白錢很重要的窮生，並沒有為此而變成為利是圖的人。 反而憑著理財的優勢支持自己繼續當這不能搵食的工作。 天生數字狂，乜都鍾意計一餐，卻反而是個設計工作者，相信人是立體的，人生也一樣。有了理財技能使我可以「窮一生」的追逐興趣！