當杜如風遇上杜琪峯

小女自中學年代開始，已經不斷被人問：「你爸爸係咪杜琪峯呀？你哋兩個名咁似！」「唔係，係杜可風呀！」通常被人問得多了，會很煩悶，所以就隨便亂答算了！

被問了及答了足足十幾年，終於因為自己要拍《衛視好風戲》這個電影節目，而有機會跟這位「假老竇」大導演做訪問了！聞說杜琪峯導演很惡很惡，經常在拍戲時鬧人，而且鬧得非常兇，所有人都怕了他，可以算是影壇上最惡的導演……等等傳言，節目的導演更預先給我一個很可怕的心理準備：「杜Sir試過做做吓訪問拆mic走o架！」「吓！拆mic走？點解咁嚴重呀？唔好咁嚇我啦！」「我諗係個主持問咗啲佢唔想答嘅問題啩！」「吓！咁我點知佢邊啲想答、邊啲唔想答呀？」「你又唔使咁緊張，總之你問佢有關電影嘅嘢就OKo架啦……不過其實我哋成隊crew都好緊張，睇你啦！」「睇我……」（死得！）

訪問當日小女緊張到早上七點半就彈醒，（其實訪問時間是下午五點），然後自己又再一次重讀，前一晚已經做好關於杜Sir的research，再自己set好一些自己一直想問杜Sir的問題。幸好小女對杜琪峯的作品都算相當熟悉，set問題就盡能力set得「深層」一點，希望他聽後不會拆mic走人！

當杜如風遇上杜琪峯，即時變回小學生見校長般恭敬，不過最後始終不離惹笑搞鬼本色。

到正式訪問，杜Sir來到訪問場地set mic時還是一臉嚴肅，小女就非常恭敬地站起來向他鞠了一個躬：「杜Sir多多指教，今日麻煩晒你啦！」（小學生見校長一樣！） 然後訪問正式開始，小女第一個問題是：「知道杜琪峯大導演非常欣賞日本黑澤明導演嘅作品，尤其最愛《七武士》同《天國與地獄》，唔知道黑澤明對你喺揣摩電影嘅創作思維同拍攝手法上有咩嘢影響呢？」嘩！杜Sir即時變臉——係由好嚴肅的一張板臉變出慈祥的笑容來！小女僥倖地set中題目，成功將冰山劈開了！（真的感謝黑澤明大師！也感謝自己看過這兩套作品！）……「對呀，其實小女自己也最愛《天國與地獄》，佢嗰種細緻嘅描述手法真係好犀利！」當我答完這句咀後，杜Sir又歡樂了一點，整個訪問的氣氛都輕鬆起來了！杜Sir少有地談笑風生，暢談他的電影觀，還跟我開玩笑：「哦，你係問我嘅愛情小品？我幾驚你問我嘅愛情呀！講八個鐘都講唔完呀！哈哈！」

整個訪問就在一片愉快的氣氛底下度過！最後杜Sir都有拆mic，不過我好sure他是笑着拆的。他在離開前還問我：「你講嘢不嬲都係咁『一節節』o架？我有睇過你個節目，一時講講吓呢樣嘢，又會飄咗去第二度講第樣，幾好玩吖，幾開心吖！」嘩！受寵若驚呀！！原來杜琪峯大導演竟然有睇過小女嘅山寨版旅遊節目！我即時報告畀我嘅「真老竇」知，自我膨脹一下！嘻嘻！