兩年後結婚！林耀聲搵錢養埋「沙律」

演員林耀聲日前拍了一條由麥曦茵執導的網上短片，片段在短短兩星期內更已突破100萬點擊率，講到短片以父女情為題，當中他更首度飾演爸爸角色，對此他表示：「都係一個突破，因為之前演親都係比較年輕、學生嘅角色，所以今次演爸爸嘅心情係非常興奮，終於可以演一個比較成熟嘅角色。」為了演得更入型入格，他亦特別留鬚，問到事前可還有做甚麼準備功夫？他笑言：「都係觀察自己爸爸，加埋入面阿囡又咁得意，所以真係好似當咗自己個女咁。」

認定結婚對象

問到現實生活中可會想做爸爸？林耀聲坦言喜歡小朋友，希望將來可以生兩個，最好一仔一女，而模特兒女友張沛樂（沙律）都很喜歡小朋友，問到兩人可有計劃何時拉埋天窗？現年28歲的他坦言未有計劃：「暫時唔諗住，專注事業先。（想大約幾多年後結？）我諗都係30歲後嘅事，呢幾年唔諗住，等事業穩定、養到屋企、養到佢就會諗結婚嘅嘢。」雖然他謂兩人未討論到結婚話題，但互相已視對方為結婚對象。

同女友拍親熱戲會尷尬

工作方面，林耀聲透露近來忙於拍攝兩套電影，一套是關於MMA（綜合格鬥），另一套則是飾演宅男。而為了演好MMA的電影，他不但每日積極練習7至8小時的MMA技巧，亦有操肌節食，但他大呻：「好慘，因為我瘦底，所以我依家要狂逼自己食嘢，例如番薯、薯仔，我希望增到140磅，同埋都要食啲白烚雞柳、西蘭花、雞蛋，但好難食，有時食到想嘔。」講到他這樣辛苦，女友可有怎樣支持他？他謂：「佢會同我食飯，同埋有時我練到好攰，佢都會幫我按摩。（佢會煮嘢畀你食？）係呀，都係煮啲白烚嘅嘢畀我。」而講到女友現時都有拍戲，問到他可介意兩人合作拍戲？他謂：「如果有機會都想試吓，畢竟未試過。（飾演情侶呢？）都可以，更加自然。（演埋親熱戲都得？）咁呢個就有啲尷尬。（唔OK？）唔係唔OK，都係睇劇本需要。（床上戲呢？）都係睇劇本。」

場地：港島海逸君綽酒店