大家睇電視劇都睇過的故事劇本，本來一個家族，開左一間拉麵店，生意好好，日日做到無停手。但突然間一日，細佬唔滿意阿哥話晒事，阿哥又唔滿意細佬煮d麵唔岩心水。咁最後就係阿爸默許既情況下，各自開店，營運自己的生意。表面上保持和諧，做個樣畀老豆睇，實際上互搶生意。
係強積金界都有咁既情況，由2000年強積金成立時，已經有中銀保誠既easy choice(簡易強積金計劃)，該計劃由中銀保誠資產管理做基金經理，由中銀保誠信託做信託人，大家各自管理自己的範疇，合力打江山。一打就打左10年，到左2010年，中銀保誠信託突然醒覺，與其同兄弟夾份打江山，不如自己獨力打，唔洗同人分。就係2010年，中銀保誠信託推出了my choice，同自己兄弟既easy choice打對台，但同時又繼續幫easy choice計劃做trustee，信託人的工作。係老豆默許之下，食兩家茶禮，進可攻，退可守。
中銀保誠信託因本身沒有投資的相關部門，所以my choice 我的強積金計劃入面都係用一對一買入其他基金公司的基金形式來管理。現時my choice 計劃內共有14隻基金。因為是一對一直接買入，所以每一隻my choice既基金內買什麼基金也會在基金說明書內列出。而如果中銀保誠信託覺得有邊隻基金表現唔好，想換走底下既基金，都要通過修改基金說明書的程序，得到sfc同mpfa的認可。因為係1對1買入，要做既野唔係咁多，所以佢就用平費用來招客，而且買入既都係大品牌公司既基金。
一轉眼，中銀保誠信託自立門戶左10年，佢都未能做到當初所想咁大，不過不失，論資產總值係強積金平台市佔率大約0.25%，得個廿幾億元，係2020年9月係28個計劃入面，佢只係排23，仲係細過easy choice好多。不過，因為my choice所投資既係d大牌子有名的基金，表現有時都好好，所以基金頒獎禮中久唔久都見到my choice既影子。
上面提及my choice係用1對1既方法買入其他基金，每一次改買入既基金都要修改基金說明書，要證監同積金局批，雖然過程繁複，但my choice 都好積極管理佢既強積金所投資既基金。好似佢係今年6月都一口氣換左自己計劃內環球股票基金同環球債券基金所投資既基金。
環球股票基金的投資經理，在2020年6月起由schroders施羅德接替franklin templeton。Franklin templeton既global equity fund做得有幾差？比d數大家感受一下，係2017年，25隻同類基金入面排22，2018年排15，2019年排20。Templeton global equity fund點解會做得咁差呀？因為佢太有個人特式，美國今年表現好，好多同類基金都起碼跟返參考指數，持有近60%美國，但templeton就嚴重買少美國，得30%，另一方面歐洲今年表現普遍較差，佢就買重歐洲。年初至10月底，參考指數內既美國、亞洲地區，微升1%至3%左右，歐洲地區就跌13%。
因為my choice剛轉左環球股票基金既投資去schroders，所以本身買緊my choice環球股票既供款人唔洗咁緊張喇，可以再靜觀一下，因為schroders環球表現較平穩，雖然未必會表現十分突出，但也中規中矩，今年初至10月表現，25隻同類中排12。
咁點都好過鄧普頓環球股票。大家睇圖見到如果將鄧普頓、施羅德同類別平均數作比較，會發現係2000至2010年鄧普頓真係多數勁過平均數，但係2010年後佢就愈來愈差，過2013年後更多數時間差過平均數。如果將鄧普頓同施羅德直接比較，就會發現如果由2000年開始作比較，鄧普頓累計升幅仲係勁d，但睇另一圖就睇到鄧普頓贏既幅度都係由2000至2010年累積，如果由2010年起，施羅德就表現好過鄧普頓。
2010年前鄧普頓表現強勁，my choice先會將佢放入名單，但就摸頂買入，之後鄧普頓就一直表現不濟。大家又立即會想到，今次換入施羅德會不會又係咁情況？
我哋搵到mass 萬全既環球股票基金同環球債券基金都同未換基金前my choice一樣，買入鄧普頓的環球股票基金同環球債券基金，而年初至10月底，mass 既環球股票基金跌10.9%，但my choice因為6月中換了基金，所以只跌7.9%；環球債券基金方面，mass既基金年初至10月底跌0.7%，但my choice 因為轉了基金，年初至10月底升0.6%。所以唔理長遠係咪會轉差，最少近期已贏了。
講my choice，一定唔可以唔講佢隻中國股票基金。佢係直接買入JP Morgan既宜安大中華基金，呢隻jp morgan既基金真係勁，佢截至10月底係強積金中國及大中華類排名，不論，1年，3年，5年，10年既表現都係24隻同類基金中排第一！佢仲係今年初至10月底係強積金平台上幾百隻基金內表現最好既基金。
網上搵到呢隻基金同相對應既參考指數比較既圖，發現佢由2007年成立開始到2019年的表現，一直同指數十分相似，直到2019年開始，呢隻基金突然蘇醒，發力跑過指數。至10月底的一年表現，基金上升了38.4%，而指數則只升了13.7%。
大家睇圖就可能覺jp morgan大中華係2019年前同指數似，但我哋用另一圖分析一下，其實2017年時佢都開始唔再同指數好似，點解呢？因為係2017年jpmorgan換左另一個基金經理，新人事新作風，所以2017年後隻大中華股票基金既表現同之前唔同。
2017年換咗基金經理後，基金有點表現出大升大跌的風格，升又升得多，跌又跌得多，2017、2019年2年升市，佢升幅比指數、類別平均數都多，但2018年跌市中，佢跌幅都比指數或平均數多。（圖）
分析員出身既基金經理偏重於揀股，基金最近既持倉，第一大就係台灣股台積電，佔比有9.8%，我哋熟悉既騰訊就係第2大持倉，佔9.7%。指數既科技股佔大約27%，基金就有約32%，比第二季的35%科技股減少了，應該獲利轉了倉。話晒大行對投資監管較嚴，科技股的比重雖然多過指數，但都唔係好誇張地多。之前同大家講過的海通基金，就同指數有好大出入。有興趣的朋友可以睇番相關影片。
基金大幅跑贏既原因除左因為買重左熱門科技股外，係十大持倉中，仲有金蝶國際(268)、藥明生物(2269) ，呢兩隻唔係指數的重磅股票，但呢兩隻股票都在2020年有十分可觀的升幅。買中咗咁多大升股，難怪隻基金今年一支獨秀啦。
另一方面，我哋見到多人買既基金同表現未必有關係。My choice 既中國股票基金買入既呢隻jp morgan大中華股票基金在類別內一直表現強勁，但my choice中國股票基金既資產淨值好細，排資產值，佢同類中排16，資產值最大的是宏利的中華威力，因為中華威力成名已久，雖然近期表現唔多突出，但仲好多人買緊佢。大家可以睇返我哋講宏利的片。但連隻表現差既aia中港基金都多過my choice中國股票基金，咁真係說明左有好多人無理自己的mpf，大家記住要留心d自己既mpf,果d都係你既錢來的。
延伸閱讀
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
