巴塞大勝　沙維豪言可後上奪冠

周六(24日)深夜西甲，巴塞隆拿主場以4比0擊敗基達菲，取得近5個月最大勝仗，並追至落後踢少1場嘅榜首皇馬5分，將於今季結束後離隊嘅教練沙維洗脫頹氣，豪言仲有機會可以後來居上，奪得今季聯賽冠軍。

沙維今仗變陣，派出拉芬夏比洛尼及傷愈不久嘅祖奧菲歷斯擔任正選，2人果然不負所托，開賽20分鐘，拉芬夏比洛尼單刀射入打開紀錄。換邊之後，祖奧菲歷斯近門射成2比0，跟住拉芬夏比洛尼又創造威脅，回傳畀法蘭基迪莊射入。

戰至補時，洛基費拉拿單刀起腳，被門將大衞蘇利亞撲出，費明補射入網，協助巴塞贈基達菲4蛋，近5場聯賽取得4勝1和。

賽後沙維表示，仍然有信心可以衞冕西甲：「現時講邊隊奪冠，其實言之過早，我哋必須相信自己仲有捧盃機會，我認為今季有可能贏得西甲冠軍。」另一支爭標球隊馬德里體育會作客被艾美利亞逼和2比2，已落後榜首皇馬10分，兼踢多1場，預料今季西甲成為皇馬、巴塞隆拿、基羅納之爭，皇馬同巴塞將於4月交鋒，可能成為冠軍誰屬最關鍵一戰。