喺六十年代正值粵語片嘅盛期,嗰個年頭影壇上有唔少巨星。當年影星之間都比較著重[情義],因為當時好盛行拜師、上契、結拜同結義金蘭。因為咁,片場上經常出現好多個組合,例如有[八牡丹]、[九大姐]、[十兄弟]、[十二金釵]等等。當中最成功嘅,要算係[七公主]嘞!
七公主[影壇七公主]
係粵語片時期,七位著名上契結拜女演員嘅稱號。七公主大部分都係大紫大紅,當中嘅成員依次序係:馮素波、沈芝華、陳寶珠、蕭芳芳、薛家燕、王愛明、馮寶寶。
七兄弟[梨園七兄弟]
喺1964年七位梨園同行結義為異姓兄弟,組成[七兄弟],成員有:麥先聲、尤聲普、潘有聲、陳玉郎、雲展鵬、黎家寶、文千歲。
八牡丹[正印八牡丹]
六十年代演藝界潮流興結義,八牡丹成員全部都係紅伶花旦,就算于素秋亦係平劇刀馬旦,惟獨林鳳係出身邵氏嘅玉女明星,佢哋年齡同最年長嘅余麗珍都相差成十七年,就算同排行第7嘅南紅相比亦都差成六年。成員依次序有:余麗珍、鄧碧雲、鳳凰女、羅艷卿、吳君麗、于素秋、南紅、林鳳。
九大姐[二幫九大姐]
喺六十年代有九位〔二幫花旦〕上契結拜成金蘭姊妹嘅稱號。佢哋原本結義嘅時候係有十個人,因為其中嘅[紅豆子]出嫁,要專心相夫教子而退出戲台前,所以就由[十大姐]就變成之後嘅[九大姐]。當中嘅成員包括:李香琴、任冰兒、朱日紅、金影憐、英麗梨、梁素琴、許卿卿、黎坤蓮、譚倩紅。
十兄弟[電影十兄弟]
喺1959年上映嘅一部粵語長片,背景係民國初年十個擁有異能嘅兄弟遭遇。故事有[團結就是力量]嘅寓意。電影十兄弟嘅成員有:司馬華龍、林魯岳、金雷、林甦、高超、朱由高、陳耀林、譚天、曾楚霖、胡凱欣。
十大導[影壇十兄弟]
十大粵語片導演享負盛名,佢哋各擅勝場,風格互異,合共導演咗近1,500部粵語、潮語、國語、廈語片,其中成就咗好多經典名作。佢哋喺1963年以[十兄弟]嘅名堂結義,成員包括:黃岱、莫康時、龍圖、胡鵬、馮志剛、李鐵、吳回、黃鶴聲、盧雨岐、珠璣。
十二金釵[中國電影十二金釵]
受電影《紅樓夢》啟發,十二位早期已參演中國電影女明星,1963年喺香港結義金蘭,被香港報章輿論稱為[十二金釵]。成員有:黎灼灼、陳皮梅、馬笑英、李倩顰、黃曼梨、高偉蘭、李月清、容玉意、黎雯、徐意、甘露、鄭雯霞。