武動師徒情
武術博大精深，「尊師重道」更係着重修養，啱晒用嚟形容今晚嘅嘉賓張苡澂（Venus）。Venus擔任「Paco巨星飯堂」嘉賓，都特別誠邀佢嘅師傅、香港拳擊總會永遠榮譽主席徐家傑同任嘉賓，深明尊師之理。
我同呢對師徒去到位於天后嘅「Jacky's Oyster Bar」，品嘗鮮味海鮮、fusion菜式之外，亦同徐師傅、Venus暢談學武、飲食之道。
今晚我同Venus（左）、徐師傅（右）品嘗海鮮、fusion菜式，再談武德，氣氛融洽。
Venus即將進軍荷李活，心情興奮。
進軍荷李活
Venus正朝歌、影雙棲方向同步發展，仲積極準備喺14年3月重返樂壇，佢興奮地表示：「我搵咗林慕德做我嘅唱片監製，佢作咗一首快歌畀我，對我嚟講係一個新嘅嘗試，所以我o依家每一日都好勤力練舞，希望以最fit嘅狀態見人，等大家認識另一面嘅我。」
哈哈哈！多變化、多方向係做藝人不可或缺嘅條件，Venus亦朝着呢個目標進發，「我都想做到實力派嘅唱作人，不過我知道呢樣嘢唔可以一步登天，要循序漸進。喺呢3年裏面，我完全無偷懶，不斷咁裝備自己，我會逐步實現我嘅目標。」
Venus裝備自己嘅其中一部分，就係拜徐師傅為師，「師傅喺武術界德高望重，能夠拜佢為師，令我多一份動力。每星期我都會同師傅練拳兩次，每次都全力以赴。嚟緊我會喺一部荷李活電影入面做打女，到時就可以用師傅教我嘅功夫嘞！」
海鮮拼盤係另一道令人食不停嘅前菜。
話明係Oyster Bar，生蠔自然不可或缺，今晚我哋就試咗Saldanha Bay、South Pacific-Carlingford同Gillardeau四款，同樣新鮮。
令我讚口不絕嘅香煎西班牙黑豚豬扒（$320），外脆內juicy，一定要點！
海膽（$350/板）來自加拿大，巨型而肥美。
睇得又打得
徐師傅就大讚Venus用心學武，「初時我以為好似Venus呢類型嘅靚女，會覺得學拳比較污糟，即係出晒汗咁樣。不過，上第一堂嘅時候，佢已經用行動話畀我知佢真心學武，出盡全力，我好欣賞佢呢個地方。
「有唔少喺影圈有啲知名度嘅人都有跟我學拳，係邊個我就唔點名講嘞，佢哋好多都好努力。我諗我可以教佢哋嘅嘢，除咗強身健體之外，就係點樣喺鏡頭前打得流暢又好睇。o依家佢哋學拳，都唔係用嚟打人o架嘞，實用啲就係等佢哋打得好睇。武術，其實係一種藝術，而且仲係源遠流長嘅添。」
講到徒弟Venus，徐師傅大讚勤奮，孺子可教。
徐師傅同Venus都愛食海鮮，面對呢隻巨型皇帝蟹（時價），愛不釋手。
哈哈哈！所以徐師傅仲出力支持「十大武術宗師」，「香港武術文化」、傳統力量好深厚，派系多。喺11年嘅河上鄉洪聖寶誕100周年，就撮合咗『十大宗師』表演唔同嘅武術，之後就成為定期活動。
「十個門派包括太極、蔡李佛、周家螳螂、八卦、龍形、六合八法、古泰拳、鷹爪、洪拳同詠春，旨在後輩可以喺前輩身上學習，為日後培育人才打好根基。」
香煎智利鱸魚（$250）清新可口。
法式烤乳豬（$280/1/4隻），皮脆肉嫩。
海鮮最Yummy
同武術一樣有影響力嘅，就一定離唔開飲食，今晚我同兩位嘉賓去到「Jacky's Oyster Bar」，原來就開正兩位嘅「食路」。徐師傅話：「有時我同太太撐枱腳，都特登叫一隻皇帝蟹，兩個人食唔晒，就打包返屋企食，屋企啲貓聞到，個個都精神晒！」
Venus就話：「我好鍾意食生蠔，之前我慶祝anniversary（結婚周年紀念），老公特別為我準備咗5打生蠔！哈哈！我好鍾意食嘢，咁食得是福吖嘛。所以，我唔會為咗減肥而節食，始終食係一種享受，如果唔係人生仲邊有樂趣呢？」
哈哈哈！贊成！所以今晚我哋就同享佳餚美酒，乾！
徐師傅一心弘揚武學，講起呢個心願，佢一臉正經。
我同徐師傅（左一）都欣賞科班出身嘅老闆Jacky（右二），右一為老闆娘。
白酒煙肉煮青口（$160），惹味鮮味共冶一爐。
法式烤油鴨髀（$230/2件），內外口感層次豐富。
慢煮澳洲和牛面頰（$250）以慢煮方式保持肉質嫩滑。
Jacky's Oyster Bar
