雅虎香港財經 
一世免費優惠「手尾長」
金記冰室早前豪送「一世免費」食打針獎賞，即時登上人氣搜尋榜。一世免費看似吸引，但對企業及中獎人而言，從營商角度可能係「手尾長」煩惱。
美股、外匯、加密貨幣免費即時報價，自選投資組合獲取相關新聞提示
雙重「唔認數」風險
叫得一世免費，以現代人壽命計，中獎人期望享用期長達四、五十年係等閒事，但就唔係人人期望可達到，首先會衍生「唔認數」風險。全球大都會消費旺區餐廳都有開得快、執得快情況，香港亦不例外，中區、銅鑼灣核心地區餐廳，每年洗一次牌已見怪不怪。即使已上市餐飲企業都不時出現上市一、兩年後業務大轉型兼賣盤情況。因為餐飲企業「可持續經營」難度高，所謂一世免費大獎，食客能夠享用幾年已經難得，如果要延續下去，與新東家隨時又有糾紛。
吉野家「貴賓碗」事件
餐廳或餐飲企業執笠搞到「唔認數」，中獎者都只能無奈接受。但另一種情況係餐廳仲如常經營，但一世免費獎賞就慘被「唔認數」。日本經典例子係漫畫《筋肉人》曾幫忙當年陷入經營困難的吉野家從谷底翻身，吉野家向作者贈送「貴賓碗」作大禮，並承諾作者拎住碗入吉野家就可以免費任食。豈料多年後作者參與電視台節目，雖然電視台已事先聯絡吉野家會拍攝，但作者拎出「貴賓碗」吉野家職員卻不知這是甚麼東西，令作者非常尷尬，後來更索性改與吉野家對手すき家合作。吉野家「唔認數」未必係刻意留難《筋肉人》作者，更有機會係餐飲業由管理層到前線員工流失量大，經過幾年已無人記得此事，所以見到「貴賓碗」都唔知係乜。香港餐飲業管理人及前線員工都經常大換班，重演「貴賓碗」事件亦不足為奇；茶記一餐數十元，俗語一句如果「食到乞食咁」，又會失去獎品原意。
現金禮物最實際
另一隱憂係餐廳易手。這類大獎條款通常講明獎項由該餐飲企業送出，不過一旦餐飲企業易手兼改名，新東家就可能大條道理唔認數。為了免費飯打官司未免倒錢落海，最終中獎者都係一肚氣，對新東家亦都係無妄之災。
考慮上述風險，餐飲企業日後都應該改送一萬份早、午、晚餐，又或直接豪送黃金、現金禮物最實際，如果真係要送一世免費，最好由老闆現身解釋親手咁送，講明見到老闆先幫你免費。
相關報道：
