沈震軒入戲扮憂鬱
今年三十五歲嘅沈震軒(Sammy),近來正忙於拍攝ViuTV新劇《好人好姐》。東姑八到,劇入面佢會同五十四歲嘅劉美君,大玩忘年戀。論年紀,兩人雖然相差接近廿年,不過論外形佢哋拍埋又好襯,相信Sammy都下過吓苦功。
早前,東姑就喺九龍仔公園附近見Sammy為呢部劇拍外景。當時,佢着到成身「老西」戴埋副眼鏡,扮老成持重,喺度拍一場得佢一個人嘅獨腳苦情戲。現場見佢一時挨住車邊扮憂鬱,一時坐喺車上扮憔悴,真係chok晒咁擺晒pose,唔知嘅仲以為佢喺度拍MV,而唔係拍劇o架。
斷估,場戲應該係講佢喺劇中同劉美君「母子戀」嘅感情煩惱,難為佢自己同自己做戲,都咁入戲,相信同「金馬影后」劉美君做對手戲時,肯定更有火花喇!
着住一身「老西」戴埋眼鏡嘅Sammy,挨住車門邊,chok晒咁扮憂鬱小生。
坐入車廂繼續頭耷耷扮死狗,睇嚟劇中嘅Sammy,正為感情事而煩惱。
全晚外景,Sammy投入喺憂鬱嘅角色入面,真係「唧」都唔笑。
由劉美君監製兼主演嘅ViuTv新劇《好人好姐》,劇中同Sammy發展忘年戀,聽聞仲有唔少親熱戲。