話說早幾日曼谷假期，同老婆仲有兩個同事由曼谷揸車去柬埔寨，個邊境叫(波別)，由曼谷揸去大約4個鐘，條路都算好揸，車泊喺泰國邊境，然後行路過柬埔寨，由泰國過去都好順利，過左泰國 immigration 之後就已經到左柬埔寨，果下感覺有啲奇怪，但又諗唔到奇在邊度。

咁就周圍行下，柬埔寨邊境有好多賭場，周圍感覺好落後，近近地搵間叫做似樣啲嘅酒店住，問下價錢先，多謝25,000泰銖，嘩…成6千幾港幣一晚？澳門都唔使啦，走人去搵間平啲嘅，感覺好有王家衛導演鏡頭下嘅感覺，例如春光乍洩 阿飛正傳…，又或者以前啲人著草果啲感覺，成為1,000泰銖一晚，水弱冷氣唔凍，幾驚有個如花撩住鼻屎敲門。

Check in 完，出去搵到唯一間似樣啲有人唱歌嘅露天餐廳，睇 Menu 嘢食唔錯，價錢尚算合理，叫左6樣嘢食，飲左5支啤酒，幾支汽水，1500泰銖埋單，食物質素可以，但係上菜超級慢，慢過食法國菜。

好唔容易過左一晚，就嗱嗱聲 Check out 返泰國，去到邊境見到嘅情景儍左，目測當時有千幾二千人喺酷熱嘅天氣下排隊過境，而當時只有4個關員處理，排左3個鐘終於排到櫃位，晴天霹靂嘅事發生啦，記得上面我提過覺得奇怪嘅事嗎？呢個係泰國嘅 immigration，原來我地入左柬埔寨境後，無去柬埔寨嘅 immigration office 蓋印，點解入左境之後要去搵個 immigration office 嘅？乜唔係連住架咩？咁又要出番去柬埔寨搵個 immigration officer 蓋番印，果度啲人話你地過期無蓋印又無簽證，每人罰款 1,600 加 500泰銖，再返到去泰國境，雞同鴨講，要我地再排過隊，無可能啦，我帶住3個人一齊衝呀迫呀咁去到櫃位理論，有彩關員認得我地，咁就帶住疲勞的身軀再揸4個幾鐘頭車返曼谷。

總括，自駕遊幾好玩，但柬埔寨邊境好落後，賭場會停電，啲人會無嗱嗱拉住你，幾危險下，入境後要去搵柬埔寨嘅 immigration office 係好遠架，所以去一次就夠啦。