豬年四高官燶燶哋
豬年到，金豬唔怕拎，最忌「豬隊友」常在左右。最近政府連番甩轆，「熱廚房」愈來愈，有四位局長更加係燶味極濃，頭號相信係勞工及福利局局長羅致光。智商高達一百六十嘅羅致光，喺收緊長者綜援申領資格嘅議題上，連番犯上低級錯誤，不禁令人反問：「係咪高分低能？」
羅致光被問到點解要收緊政策，佢一句：「長者定義遲早都要改，當大家都有一百二十歲，六十歲嘅人係o岩o岩中年。」被批評涼薄。
本來長者綜援風波喺特首林鄭月娥宣布推出就業支援補助金「補鑊」，六十至六十四歲嘅長者，搵到工可以變相攞到全額長者綜援金後，事件本來漸漸平息，點知之後，羅致光闡釋搵唔到工嘅長者要扣減二百蚊綜援金嘅規定時，再形容呢個係「象徵式懲罰」，被指係對失業長者嘅負面標籤，認真係開口夾着脷，再次炒熱呢個議題，林鄭惟有介入，局方最後讓步擱置扣錢規定，但都撲唔到幾多火。
據了解，扣二百蚊嘅做法沿用於「自力更生綜合就業支援計劃」，羅致光嘅講法係貫徹咗該制度嘅規定，但喺大家罵聲四起嘅時候，佢仲講咁官僚嘅說話，未免係火上加油。
有熟悉羅致光嘅政界人士對於佢講呢番話唔感到意外，「佢好講原則，因為制度係咁定，就一定要咁行。」政界中人也認為，事件反映精英主義有時令政府忘失謙卑，市民聽起上嚟係好刺耳。
另一位惹火官員要數運房局局長陳帆，有人揶揄佢中咗「數字魔咒」，掂親同數字有關嘅政策都當黑，先有一地兩檢爭議，最近三隧分流方案又流產，咪話唔信邪。
（右起）羅致光、陳帆、陳肇始及黃錦星喺嚟緊嘅豬年，相信都有好多政治炸彈等緊佢哋去拆。
不過，林鄭似乎未灰心，佢日前接見建制派各黨，有與會者透露政府撤回三隧嘅動議，但無諗過放棄，會喺灣仔繞道通車一段時間後，檢視車流量變化，再用數據說服議員支持。消息人士透露，當局有意今年內重推方案，到時陳帆能否破解「數字魔咒」？拭目以待。
如果論諷刺就非食衞局局長陳肇始莫屬，護士出身嘅佢，喺流感殺到公立醫院逼爆事件中，一度俾醫護噓，有前線醫護批評，該局對人手問題無未雨綢繆，將問題卸晒畀醫管局。「o依家喺醫院做到踢晒腳，唔係官員落嚟做吓騷、聽吓意見我哋就收貨，政府要有啲實際紓緩人手緊張嘅措施至得。」
環境局局長黃錦星推行嘅垃圾徵費，都好似慢慢聞到燶味，據聞一批管理公司已經同政黨密謀推翻呢個政策。有業界指出，該政策下，管理處只處理用指定膠袋裝嘅垃圾，變相將執法責任轉嫁畀管理公司，增加佢哋嘅營運成本，所以佢哋會用盡方法阻止新例通過。照咁睇嚟，豬年好多政治炸彈等緊林鄭班子。
羅致光連番尖酸說話炒熱長者綜援爭議。
消息指，政府未放棄三隧分流方案，方案今年內會捲土重來再上立法會。
公立醫院醫護做到，陳肇始及醫管局高層落區聽意見，都難撲熄醫護嘅怨氣。
垃圾徵費下，管理處只處理用指定膠袋裝嘅垃圾，變相為政府執法。
