網民熱話：翠如版潮文比原版更Touching

東網電視

就係一張相，引發咗一篇潮文，又引起咗一班感同身受嘅人，話自己都好似洪永城同黃翠如咁....

「能成為密友大概總帶着愛…」藝人黃翠如與洪永城自從拍檔主持節目《走過浮華大地》後，即成為眾人眼中天造地設嘅一對。鏡頭前後，兩人唔會好似情人咁Sweet爆示人，亦唔會表現到好關心對方，反而得閒寸吓對方，又鬧吓對方係「死八婆」、「死八公」，但如此嘅相處方式，已經比情人更Sweet。

日前黃翠如與洪永城手拖手出席活動，有網友指兩人展露出前所未有嘅笑容，更有人「洪永城上身」，寫出一篇以《我諗每個男人心裏面都有一個黃翠如》為題嘅潮文，即被網民瘋傳，睇嚟好多「巴打」心有共鳴。潮文提到，大家已經當咗心目中嘅「黃翠如」係「兄弟」，但不知不覺間又喜歡對方。呢種感覺疑真疑假，連自己都猜唔透呢種係咩感覺。不過，當「黃翠如」已經搵到屬於自己嘅「蕭正楠」，先發現原來「黃翠如」係無法取替。

而女方又係點諗？到底當「洪永城」係兵，定係「姊妹」，還是同樣偷偷地愛上對方？有網民就嘗試代入「黃翠如」角度寫心聲，就話當對方搵到一個比自己更似女仔、更錫佢嘅「唐詩詠」後，個心會有小小唔舒服，仲發現原來同「洪永城」嘅關係已經一去冇回頭，大家已經冇可能發展成情侶：「有樣嘢比Friendzone更加一去無回頭，叫Brotherzone。」文中有提到，呢個故事就好似偶像劇《我可能不會愛你》情節，「程又青」與「大仁哥」互相喺身邊默默守候，但現實唔同做戲，只有戲裏嘅男女主角先會開花結果，現實中就只有白等……

潮文傳得熱辣辣，真正嘅黃翠如又係點諗？今日佢以第三者角色，親撰改編版潮文，佢話：「每個人心裡（裏）面都有對黃翠如同洪永城太平實普通太易代入」佢又講到拖手行紅地氈：「你哋好享受呢種互相欺負的感覺你地（哋）更加習慣左（咗）大家手拖著（着）手互相扶持行過紅地氈」結尾佢更突然轉返自己角度，由「你」變咗做「我」，真誠真意祝福對方：「我們都很想用所有的心去祝福大家『走完紅地氈台上的路希望你/妳走得更加好。』」網民指黃翠如嘅改編比原版更動人，唔怪得上載唔夠三個鐘，已經超過13000個Like！

《我諗每個男人心裏面都有一個黃翠如》全文如下：

「有D男人頭，有D亂黎，你同佢好Friend

會一齊食飯一齊宵夜一齊去旅行

但係永遠唔會撻著

你同佢好似總係有D莫名嘅共鳴

人地永遠會以為你地係一對

但你心裡面知道根本無可能

當朋友問到

你通常都答『Hi 係有D好感但係當佢係friend黎嫁咋』

但係問心

你係有小小鍾意佢

但你亦知道

佢係完全唔鍾意你

你地都好享受呢種感覺

一種好似男女朋友咁親密但係完全無男女朋友責任嘅感覺

直到一日黃翠如同蕭正楠係埋一齊

你會發覺

『Hi原來我好鍾意黃翠如呢條八婆』

但係好可惜你已經失去左一百次同黃翠如一齊嘅機會

你只好係成班friend面前繼續同黃翠如扮好朋友

得閒串下佢佢得閒佢得閒又會串番下你

但係你兩個都知其實有d野係唔同左

難得有一次工作上嘅機會

你可以再同黃翠如手拖手。。。

隔左一兩日

你睇番報紙

見到張相

你微笑

你流淚」

網民有話兒：

你xxx：同我而（依）家完全一樣　好痛苦

pxxx:巴打你講得好啱

lklklk:我未見過佢哋笑得咁開心！！

123123olX:原來我好鍾意佢呢條八婆

polly xxxun: 我接受唔到佢係一個男人囉！！

on.cc東網