無可否認，成為百萬富翁或有錢人係好多香港人嘅目標，甚至乎係一個夢想。但其實係香港地，「百萬」都已經稱唔上係「富翁」因為就算你有一百萬存款，都只係啱啱好夠比買樓嘅首期。無論如何，想係30歲前成為百萬富翁或有錢人係絕對有可能。以我為例，我23歲大學畢業，到30歲時已經有百萬港元嘅資產。
你只要跟住以下10個步驟，我保證你可以係30歲前成為百萬富翁或有錢人。
1. 要有不停揾錢嘅欲望：今時今日，光靠儲蓄係難以成為百萬富翁或有錢人。如果你啱啱出嚟社會做嘢，或者你已經做咗好幾年嘢，但感到前路茫茫，你而家就要不斷想辦法增加你嘅收入，仲要以此作為你嘅首要目標。因為只有呢個欲望先能夠令你產生動力去控制你嘅收支，而更重要嘅係咁樣會令你唔驚唔覺咁睇到非常多嘅機遇。我記得畢業後第一份工嘅得$6000，畢業5年後嘅人工已大約有$45,000（仲未計我其他投資帶來嘅收入）。
2. 千萬唔好炫耀：你嘅處事態度會影響你嘅際遇。一個鍾意炫耀嘅人，唔單止唔討好身邊嘅人，有時會令人覺得黑人憎，即係唔會得到其他人嘅協助。反而，踏實嘅工作態度會令你身邊嘅人同你分享佢地嘅成就歷程。我記得曾經有個同時經常有意無意咁同人講自己住緊私樓，又話自己睇中邊部車等等。呢位同事到最後換來嘅係經常被其他同事係背後講壞話。另外，曾經係某一個節目嘅採訪當中，有一位自稱係香港頂級商人嘅嘉賓向中國首富馬雲炫耀自己係呢樣係個樣，其後馬雲回應：「我知道我是頂級，但我永遠說我是老二」。你就知道炫耀係唔會對你有好處。
3. 儲蓄係為咗投資：記住，儲錢唯一一個原因係為咗投資。係任何情況下都唔好動用你儲嘅錢，就算應急都唔好，我建議你將呢d錢存入攞唔出嘅戶口或者地方，例如定期、其他投資戶口、買樓等。如果你預計需要動用一筆錢，你就要重複上述第一個步驟，不斷想辦法增加收入。我每年都起碼有一兩次感到窮困，因為我需要一筆錢時又唔可以隨意咁攞翻筆錢出嚟，咁我就唯有唸其他辦法出來搵錢。
4. 避免債務，除非呢筆債務令你增加收入：有錢人會善用債務作投資或創造更多財富。窮人只會用債務買一d令有錢人更有錢嘅嘢。我曾經試過向花旗銀行借一筆20萬嘅貸款，但呢筆貸款係用作對衝我外幣房屋貸款戶口嘅利息。其後外幣有升幅，我就兌換返做港幣。結果，我唔但止賺了利息，我亦賺了買賣外幣帶來嘅利潤。但我估計應該有其他人借同一筆錢來買勞力士來炫耀，值得嗎？
5. 錢會呷醋：你要相信，錢真係會妒忌人。想成為百萬富翁或有錢人，請你提醒自己增加財富係要優先處理嘅事。你唔理佢（錢），佢就會遠離你。我曾經試過要係升職同埋轉工之間取捨。如我選擇升職，我會有少許人工加，並且係對我嘅工作表現得到認同。如果我選擇轉工，我嘅職位相同，但我人工會有大幅調整。最後我選擇咗後者，而且因為我人工多咗幾十個percent，我能夠問銀行借到足夠嘅錢買另一間屋，而呢間屋我最後係3年後放賣並賺咗約150萬。如果我當時選擇升職，我係會有良好感覺，但人工就絕對不夠我借貸款買呢個物業，我就賺少150萬。
6. 金錢係不會為任何人休息：錢係不會休息、唔會瞓覺或放假。你想咩時候搵佢，佢都隨時候命。錢亦喜歡對工作有熱誠嘅人。我26、7歲時，我經常係收工後幫我上司處理部份工作，我當時唔係為咗討好上司，而係真心希望了解更多有關自己個行業，我上司日後亦將佢大部份嘅工作分配俾我處理。後來唔夠2年，我上司因個人原因辭職，佢個位就空缺，而公司亦認為我過往2年已做好「接手」準備而升我職，人工亦當然有增加。你唔需要特別聰明或需要好有運氣，但你要比你同事做得更落力、更有熱誠。
7. 思想改變命運：人會窮，但唔好與「窮」妥協。想成為百萬富翁或有錢人，你千萬唔好有「窮都無所謂，最緊要做人開心」呢類想法，或者覺得窮係好正常呢d心態。如你係窮家庭出生，呢個唔係你嘅錯，因你出生冇得控制，但到你到45歲時仍然活得很窮，咁就係你個人問題喇。你有權選擇過著清貧生活，但唔好為窮搵藉口。我記得我剛畢業出來工作時，有一段時間只能每日食方包做午餐，如果我當時接受呢種生活，我唸而家我嘅生活唔會有太大改善。
8. 搵個有錢人導師：如果你讀書時想考得好成績，你應向考第一嘅同學學習。你想有強壯嘅身體，你應該搵個健身教練。你想學好英文，相信你都唔會搵個唔識英文嘅人討論點樣學好英文。同樣地，想成為百萬富翁或有錢人，你要搵個已成為富翁的嘅導師，並模仿佢。好多有錢人係好樂意分享佢地嘅知識和經歷。
9. 錢搵錢：當你儲到一定嘅存款後，你應該用你嘅存款做投資。我第一次做房地產投資的成本係15000澳幣）我當時買澳洲樓），持貨唔夠兩年我就放售並賺得70000澳元。其後為亦有投資房地產，而每月都有相當穩定嘅租金回報。錢為你工作總好過你為錢工作。
10. 以千萬作為目標，非百萬：唔好定d太易達到嘅目標，例如：3年內要儲到10萬。呢d根本稱唔上係目標。要將目標定高d。
應用上述10個步驟，我保證你一定變得富裕。你踏上你嘅百萬富翁路途時會聽到好多人同你講「唔得」、「冇可能」等等嘅說話，但你要知道，嗰d經常放棄嘅人或者自己做唔到嘅人才會同人講呢d說話。坊間亦有好多快速致富嘅所謂方法，你要避免呢d所謂方法，只要你一步一步慢慢嚟、唔好放棄，你就會去到終點。但你達成目標後記得同其他人分享你嘅成功路呀。
