重返樂壇開騷　蔡立兒預告孖梁漢文合唱

歌手蔡立兒為首個個人音樂會進行總綵排，獲老公歐陽德勛及梁漢文（Edmond）擔任嘉賓。接受訪問時，蔡立兒透露今日係重返樂壇嘅第550日，而今晚將會與半個管弦樂團合作，並會分別與Edmond及老公合唱《征服》同一首肉麻英文歌。問到緊唔緊張，她笑言：「Edmond過咗我兩招，放輕鬆，keep住刺激嘅感覺。」Edmond表示今次係一口答應擔任嘉賓，更笑言蔡立兒同歐陽德勛係自己嘅前輩，而歐陽德勛就指自己係參加第3屆新秀，跟張衛健（Dicky）同屆。

短訊慰問

至於談到Dicky胞弟張衛彝離世，問到可有慰問Dicky，蔡立兒同歐陽德勛表示有在短訊群組慰問對方，亦知道對方要處理事後工作：「佢OK，送上祝福，Dicky同大家交代嘅同我哋相同，希望一切安好，Dicky媽咪同屋企人都好堅強，希望盡快調整好心情，開心生活。」而Edmond就透露自己已慰問了Dicky，覺得做兄弟及朋友會送上祝福。

因漢洋認識洪羅拔

另外，提到洪羅拔因病離世，Edmond直言今早才收到消息，自己因同屆新秀嘅漢洋而認識洪羅拔：「對上一次見係上年生日會，之後一路都冇乜見面，老實講我係唔知道佢有咩病，其他嘢我諗留番畀佢比較親嘅朋友同親人去交代。」