გივი მიქანაძე: კარგი იქნებოდა, მაღალჩინოსანს ამერიკის შეერთებული შტატებიდან, დაეკონკრეტებინა, რას გულისხმობს ევროკავშირის სტანდარტების კონტექსტში

კარგი იქნებოდა, მაღალჩინოსანს ამერიკის შეერთებული შტატებიდან, დაეკონკრეტებინა, თუ რას გულისხმობს ის ევროკავშირის სტანდარტების კონტექსტში, - განაცხადა განათლების, მეცნიერებისა და ახალგაზრდობის საკითხთა კომიტეტის თავმჯდომარემ, საპარლამენტო უმრავლესობის წევრმა გივი მიქანაძემ გამჭვირვალობის კანონპროექტის შესახებ აშშ-ის სახელმწიფო მდივნის თანაშემწის ჯიმ ო’ ბრაიენის განცხადების შესახებ.

„კარგი იქნებოდა, მაღალჩინოსანს ამერიკის შეერთებული შტატებიდან რომ დაეკონკრეტებინა, თუ რას გულისხმობს ის ევროკავშირის სტანდარტების კონტექსტში, ანუ რა კონტექსტში უნდა იყოს კანონი დაახლოებული. თუმცა, რა თქმა უნდა, ჩვენთვის მთავარია, რომ ნებისმიერი წინადადება, რომელიც სამართლებრივ ჩარჩოში იქნება წარმოდგენილი, იყოს შესაბამისი არგუმენტაციით გამყარებული, ამ შემთხვევაში ჩვენ მზად ვართ მის განსახილველად და პოზიციების შესაჯერებლად”, - განაცხადა გივი მიქანაძემ.

ევროპისა და ევრაზიის საკითხებში აშშ-ის სახელმწიფო მდივნის თანაშემწემ, ჯიმ ო’ბრაიენმა გუშინ გამართულ პრესკონფერენციაზე განაცხადა: "არც პროცესი და არც თავად კანონი არ არის შესაბამისობაში იმ სტანდარტებთან, რაც არის ევროკავშირში. ჩვენ იმედი გვაქვს, რომ ვიხილავთ ამ საკითხის ისე განხილვას, რომ ეს იყოს შესაბამისობაში ევროკავშირის მოთხოვნებთან".