登入 瀏覽本網站，可獲取積分換領專屬優惠
穿崩位1. 《乘勝狙擊》 － 林夏薇反地心吸力胸
新鮮滾熱辣既《乘勝狙擊》，第一集林夏薇就同陳展鵬一齊扮全裸上陣，當時只係得個膊頭，正常人心裡面都暗呼緊個攝影機影低啲啦，點知鏡頭一轉﹗真係有低啲啊，但林夏薇個胸反地心吸力咁堅挺，仲要有凹位，扮明有著衫仲要托一托啦，又話全裸嘅，回水﹗
穿崩位2. 《巾幗梟雄之諜血長天》－祥仔背脊一秒爆血
話說呢幕講喺爆炸時，祥仔為咗救胡杏兒，用個身遮住對方，明明個彈已經爆咗，而呢個鏡頭望落件衫仲白雪雪，點知轉眼可以污糟到仲成身血。
穿崩位3. 《梟雄》 － 爆血前傳：二五仔消失的血
做吓research 發現原來「一秒爆血」係做開有條路，係《梟雄》裡面祥仔開槍打死二五仔之後佢立即出血身亡，但下秒鐘啲血連一滴都見唔到，之前都過到骨，唔怪得《巾幗3》再嚟啦﹗
穿崩位4.《太極》 － 軍閥時代現高樓
呢套劇無綫好揼本咁專登走去雲南實地拍攝，點知真係千算萬算都敵不過攝影師嘅失算，被眼利觀眾發現背景出現一棟高樓，軍閥時代就有？真係好難說服到人喎。
穿崩位 5. 《公公出宮》 － 穿越時空的柴油火車
大台最鍾意玩主角穿越時空，今次係《公》裡面無綫就將對象改成一個柴油火車，事關明明民國初年只得蒸氣火車，但大結局竟然出現咗柴油火車，其實到底係柴油火車穿越，定係祥仔呢？
穿崩位6.《流氓皇帝》 － 美魔女周麗淇
小編相信大台一定係知道時下流行「美魔女」，周麗淇個阿婆Look，就算老到八十歲彎晒腰，「皺紋」兩個字都絕對唔會出現架﹗
穿崩位7. 《雷霆掃毒》 － 賣吓廣告先
呢套劇都成五年前，大家可能未必記得，不過嗰時真係引起一時「笑」話，事關穿崩位多攞攞，好似呢場槍竟然出現無綫三色台徽，小編明嘅，點都要賣吓廣告啦。
穿崩位 8. 《天梯》 - 手機勿亂放
呢個穿崩位唔係好多人知道，事關無綫係香港正式播出時，就用咗電腦執圖，但內地播映版本就因為趕出街趕出事囉！被人發現身在民初時代嘅陳豪件衫勁閃，所以當時網民都叫陳豪咪以為手機袋係衫裡面就無事，熄機吧啦﹗
穿崩位9. 《萬凰之王》 － 清朝特產烏龍茶
回顧一下原來已經事隔六年，不過呢個穿崩位真係經典中嘅經典，竟然係清朝宮殿上出現烏龍茶膠樽，當時網民仲笑大台係咪想借機賣廣告啊﹗
穿崩位10. 《食為奴》 － 亂入客貨Van
食為奴作為喜劇大家都預咗要笑架啦，不過全套劇最好笑，莫過古代劇突然有架貨Van 駛過，呢個穿越時空位真係令人O晒咀啦﹗
膠劇1.《神鎗狙擊》- 不死子珊VS單手攀石
嚟到講無綫「膠」劇，《神鎗狙擊》真係無可能唔提，第一集謝天華單手攀石仲要講電話，個臂力真係仲強過 Hulk 啊；另外每次都化險為夷嘅「不死子珊」，亦都每晚睇到小編嘩嘩聲架。
膠劇2.《叛逃》
呢套絕對可以話係《神》嘅升級版，今次「不死子珊」能力由陳展鵬繼承，但正所謂青出於藍勝於藍，煎 Pang 同關禮傑體能仲勁到可以跳過隔離大廈天台，當時影帝秋生就講咗句：「淨係王心慰監製都值得一睇啦﹗」
膠劇3. 《來自喵喵星的妳》
《來自喵喵星的妳》連貓都玩埋一夜情？講真淨係睇個名小編已經唔多開胃，仲要搞笑到有一幕話原來田蕊妮同趙永洪仲係貓嘅時候，試過係垃圾站發生一夜情，喂呀！使唔使玩咁大！
膠劇4. 《鐵馬戰車》 － 唐詩詠的記憶宮殿
《鐵馬戰車》本身口碑同收視都唔錯，但之後真係「膠」味越嚟越濃，尤其唐詩詠又有天眼、讀唇技能，仲要有個超強記憶宮殿，細緻到話連牙籤上嘅酒樓名、膠袋上面穿咩都記得，咁真係只能講句，「世事都被你看透了」。
膠劇5. 《桌球天王》
好記得呢套劇果個「膠味」真係揚威海外，因為當時法國花式施球手 Florian Kohler 睇完之後都大讚 Crazy，我都明嘅，打個桌球去到又晒火花又爛Cue ，咁嘅劇情都出得真係笑到人都 Crazy呀。
膠劇7.《實習天使》
認真，雖然《實習天使》係好多靚女，但多個內容真係「膠」得極度離譜，好似個病人量體溫竟然得35.4度咁低溫，但都無人Report ；有一幕香香又暈又嘔最後休克埋，洪永城連驗都唔使就知道因為係感染金葡菌，之後唔使一陣香香就立即醒返，嘩﹗洪永城唔係護士，係神呀﹗
膠劇6.《張保仔》
當小編咁樣篩選膠劇，覺得如果無加入《張保仔》，真係對唔住無綫花足3千萬咁大製作呀。劇裡面又係例牌翻炒瞬間避子彈，仲要每次船上大戰啲主角講嘢都有回音，喂喂喂，3千萬其實花嚟做特技之餘，不如用啲嚟請個有創意嘅編劇同做好收音位啦。佢哋應該冇聽政府呼籲，唔好倒錢落海呀。
膠劇8. 《大冬瓜》
話《大冬瓜》係膠劇相信冇人會反對，因為不論係主題曲同劇集名都散發出膠味濃郁，當時真係師奶都唔想睇！
膠劇9.《神探高倫布》
呢套簡直係經典啦，事關小編仲記得當時成套劇幾乎得兩個字回響，就係「剪布」，事關馬賽係入面嘅角色實在太過煩膠，每日都「布布娃娃」，真係只要播片頭曲都立即跑去熄電視啊﹗
＜延伸閱讀＞假期煲英美劇推介！
＜延伸閱讀＞盤點排骨仔變大隻佬實錄
膠劇10.《雷霆掃毒》
無錯又係呢套劇，因為裡面除咗穿崩位，其實「膠味」亦好重，因為多個劇呢位令觀眾睇到抓爆頭，好似係黃智賢日光日白著草都係第一次見；仲有林峯手揸肥皂泡竟然唔會穿，同埋染上毒癮嘅徐子珊中埋槍變植物人都可以順產生到個健康BB，到底仲有咩劇情係無綫寫唔出呢？