中聲2畢業晚宴丨肥媽為見證眾參賽者成長而推job 車婉婉重提譚輝智似裝修工人事件

歌唱選秀節目《中年好聲音2》，由去年6月海選，到上個月中舉行演唱會，經歷十個幾月嘅旅程佢哋終於正式畢業。呢日一眾中2生，聯同評審、主持、導師同埋一眾幕後工作人員齊齊舉行畢業晚宴，紀念呢咁特別嘅人生經歷。

身為導師之一嘅韋綺姍，就話見到一眾中2生個個相處得咁融合，冇話因為有啲人入唔到圍而妒忌，見到大家呢種氛圍令佢覺得好開心。張佳添就話記得當日眾中2生都係約埋喺同一場地一齊睇首播，而家完咗大家都係喺返同一場地相聚，大家都仲係咁團結，呢個氛圍就係《中年好聲音》嘅家庭呀。

出名感性嘅肥媽呢晚喊完又喊，佢話自己好鍾意《中年好聲音》呢個節目，同時為咗錄呢個節目推咗唔少job：「我出去唱歌幾十萬一場，我寧願唔唱，因為錢任何時間都可以搵，呢個節目對我好緊要，我要睇住、陪住、同你哋一齊去成長。」而身為節目主持嘅車婉婉，就話自己入行30年，做過唔同崗位，但原來一直等緊嘅就係呢個節目。同樣係節目主持嘅許文軒，就指因為呢個節目令觀眾記得自己，所以佢相當感恩呀。

評審周國豐呢晚亦自爆有面盲症，笑言對佢嚟講每個參賽者都係姓鄧，佢仲講返當日海選嘅爆笑尷尬事呀！講到外貌改變更多嘅一位，周國豐就爆當日車婉婉話譚輝智似裝修工人，婉婉聽完即為自己澄清，話自己只係講對方當日衣着同肢體動作似裝修工人。

呢日谷婭溦帶領嘅紅組，同韋綺姍帶令嘅藍組，佢哋嘅衣着顏色跟晒隊型，當中藍組嘅譚輝智仲帶領大家齊齊跳佢嘅招牌舞《屈到病》呀。講到嚟緊會唔會再有合作？古淖文就話計劃如果嚟緊谷婭溦開騷嘅話，佢哋會一齊上去搗亂。

雖然《中年好聲音2》已經完滿結束，但係顔米羔、劉威煌同譚輝智都會定期開live同fans見面。另外呢晚畢業晚宴仲安排咗抽獎環節，張佳添仲提供利是助興，大家仲為3、4、5月嘅壽星慶生呀！