香港先生選舉

香港先生選舉（英文：Mr. Hong Kong）係香港無綫電視自2005年起舉辦嘅男士選美活動，總決賽會喺每年嘅7月至8月期間舉行，大會口號係「創造男人新主義」。參賽者經過咗唔同形式嘅篩選而順利進入總決賽，勝出嘅香港先生將會代表香港參選世界先生選舉。節目曾經喺2012年至2015年停辦，直至2016年復辦。

頭7屆嘅香港先生選舉同香港小姐競選唔同，獎項並唔係分為冠、亞、季軍。喺2005年至2006年嘅香港先生選舉，會按照參賽者嘅特質分為「瀟灑組」同埋「健力組」兩個組別；喺2007年至2009年嘅香港先生選舉，會按照參賽者嘅年齡分為兩個組別，廿二歲或以下嘅會入「少年組」，廿二歲以上嘅就會入「盛年組」；而由2010年開始唔再分組。決賽嗰晚，大會安排一眾女性官方評判同埋現場六百至八百位公開招募嘅女性觀眾對參賽者進行評選，首先喺兩組分別選出嗰組嘅冠軍，並且喺兩位組別冠軍中選出該屆的香港先生。不過自2007年嗰屆開始，場外嘅觀眾可以參加匯應通電話投票，喺其餘落敗嘅參賽者入面揀一個嚟復活繼續參賽。而喺2016年復辦嗰屆，首次加入亞軍同季軍獎項，並將參選年齡降至16歲。