視后李佳芯（Ali）早前為蝦頭（楊詩敏）和連詩雅主持嘅網上節目做嘉賓，佢一反常態大爆自己情史，話自己嘅初戀男友係個大佢幾年破咗產嘅躁狂男，真係估你唔到喎！不過佢當時大冇嫌棄過對方破產，但相處咗大約3年之後就出現問題，發現對方性格極度火爆，仲成為對方出氣袋：「佢可能接受唔到自己破產，變到好似憤青咁，出街同人一少少碰撞，佢會鬧人，我發現佢有啲躁狂之後，我嗰陣好細個得廿歲咋，仲要第一次拍拖唔識點面對，覺得要陪住佢渡過難關，但最後演變到係佢會喪鬧我！好似佢喺出面好同人有衝突，我會幫口話人哋唔係有心，點知佢會鬧我『你幫人唔幫我』，其實我係想佢好，但佢又覺得我唔企佢嗰邊，令我嗰刻終於醒咗，認為呢段關係真係好唔健康，係時候要分手啦！」
其實39歲嘅Ali一直感情路坎坷，佢上年同拍拖多年嘅男友陳炳銓分手，原因係佢同對方對於結婚步伐唔一致，而令感情無疾而終，之後佢亦同過「蟲草大王」陳恩德傳緋聞，不過佢都公開否認戀情，到依家都仲係單身呀！
東網網站 : https://on.cc/東網Facebook專頁 : https://www.facebook.com/onccnews/