Days of Being Wild 本新聞台已停止更新

286愛的鼓勵 0訂閱站台

最近在學校的電腦download了一段短片,內容是荷里活打佬明星史提芬史葛Steven Seagal的「合氣道Aikido」示範。想當年阿史葛仲未拍電影(片中有唔少係黑白片段,應該年代久遠),但係身手凌厲,撻到班弟子「一楝都無」,尚有一代宗師風範(他是首個在日本開設「合氣道」道場的外國人),你估係而家o個個文又唔得、武又唔得o既木獨大肥佬咩?

史葛哥基本上從未大紅大紫,只係響92年一部「潛龍轟天Under Siege」令電影事業有過小陽春,之後就插水式走下坡;但係前年一部「豹子彈Exit Wounds」,又令史葛哥比人「掘番出o黎」。「豹子彈Exit Wounds」並非特別收得,但係其開畫成積係史葛哥職業生涯第二高(約千八萬美元), 雖然可能係黐同片另一男角DMX金糠所致,不過總算係做番場好戲,這個影壇「巨」人又再回到大銀幕。

「Half Past Dead」(暫譯:不死潛龍)係史葛哥繼「豹子彈Exit Wounds」後「意欲」重振雄風之作。為o左「萬無一失」,史葛哥根據上次經驗再度夥拍黑柴Rapper(今次係Ja Rule-----識佢老鼠)。呢部「死時卅分」故事講史葛哥飾演o既FBI臥底,奉命接近Ja Rule飾演o既黑幫份子,混入黑幫中輯捕其首領;點知響一次交易中, 史葛哥被同僚殺錯良民(?),同成班黑幫中人一拼送入重開的高度設防監獄---阿卡拉Alcatraz;某晚,獄中舉行一場死刑,一名搶劫了2億黃金的劫犯將會坐上電椅,此時一隊武裝份子攻入監獄,佔領獄中設施,威迫劫犯講出失落了的黃金下落(!)。史葛哥當然無o甘順攤,率領獄中各位好齄鬥狠同志同班武裝份子死過!

聽落都覺得個故仔痴膠線,但係部戲拍得差先係致命傷。製作人以為將Hip Hop加功夫再加D槍戰,故仔就抄o下「石破天驚The Rock」抄o下「豹子彈」,用史葛哥同一班識佢老鼠o既黑柴Rapper群星拱照就會惦,o甘就「大檸樂」啦。以承啟而言,睇史葛哥就係為o左睇佢濵人,仲要係用佢本家絕技、招招Lock頸折骨o既「合氣道」功夫;好似呢部「Half Past Dead」o甘, 史葛哥用「合氣道」同人過招o既埸口,全片只有一場o甘多,其他時間都係飛o下車或開o下槍…頂!獱槍就唔使睇你啦,o下話!仲浪費o左本片武指熊欣欣大好人才。好似成龍而家o甘o既年紀,都要一部戲打成六七場, 史葛哥o甘錫身,實比人藐啦。而且呢部戲無將史葛哥一貫o既銀幕型像(無面俾、臭脾氣差人)成功o甘表現出來,將史葛哥變到只係一隻目無表情(雖然佢一向都係)o既人型大灰熊(佢真係肥o左好多)。至於其他黑柴配角,都係一向睇到o個D「Yo! What’s Up, Man?」o個D撚o野,試問有乜好睇?唯一一個好睇D o既係飾演武裝份子首領o既Morris Chestnut,叫做有D性格。製作上就實在太令人失笑,無錢又要扮大片,於是D廠景就只有港產片水準,間隔來來去兩三個兼睇得出好細…

呢部戲玩Hip Hop +功夫已經玩到走火入魔,承啟覺得呢條Formula 根本唔係荷里活功夫片o既真正出處,唔係任何少數族裔元素都可以溝得埋欄。

可能因為部戲質素太渣,因此此片似乎仍未有機會在港上映或發行影碟。反而上個月剛在美國發行了DVD的史葛哥最新作品「狙擊速遞The Foreigner」,本港亦已出了VCD。這部作品因「Half Past Dead」在美票房口碑太差,被公司(哥倫比亞)抽起不上大戲院,改為Direct-to-Video。承啟對本片質素已不敢寄以厚望,但係見今次史葛哥不再Hip Hop,重新獨挑大樑;加上個故仔聽落都還可以---史葛哥飾演的CIA僱傭兵,奉命將一個包裹從法國送到德國,途中當然惹來黑白兩道沿途狙擊云云。於是承啟亦姑且一看本片……但係唔睇由自可,一看就把X火!呢部戲正式係o個D無Budget無剩o既「C級」動作片,話就話動作片,但係講多過做,做多過打。成部戲根本無乜動作場面,而且亦毫無設計可言;只係求其開槍時玩o下快慢動作、MTV式Montage,但係用得好濫好渣。史葛哥繼續保持「一招了」風格,全片只係正式打過一場交,仲係不足三分鐘完事,真係個「喊露」打耐D都會Miss o左。最搞笑係飾演金毛奸角o既Max Ryan,響片中比史葛哥「殺」o左兩次都「殺」唔死,真係Cult到無倫。一句講哂,無論係唔係史葛哥Fans,都唔應該睇呢部戲,免得火滾。

睇一D史葛哥o既「撩事谷」,睇到史葛哥已拍完新作「Out for a Kill」,但係導演亦係「狙擊速遞」o既Michael Oblowitz,睇怕出到o黎都係「一X樣」。而未來史葛哥將會到泰國拍新片「Belly of the Beast」,側聞仲請o左程小東做武指…唔係o卦?條友肥到o甘X樣,點飛呀?



附圖: 「狙擊速遞The Foreigner」(左)與「Half Past Dead」(右)電影海報