裝修真係心累，遇到啲黑店更加係一殼眼淚🫠 年頭開始裝修，傢俬無跟裝修公司做，用咗朋友用過話ok嘅一間深圳傢俬公司 (Tio 提奧，Tel:68452349)，Whatsapp 初步報價落咗訂度尺，當時報價單都係寫「提奧」，之後上深圳門市傾設計圖，上到去，舖頭名唔係寫「堤奧」，係寫「柯思特美Austeme」，出單都改咗寫「柯思特美」，班人又係同一班人，我雖然覺得奇怪，但係裝修如火如荼，傢俬又傾咗大半，都無深究太多。 不過事實係，同一間舖無啦啦用兩個名搵食，一定有伏，而事實，我都中咗伏⋯⋯ 初初報價係平，之後出晒設計圖，樣樣都要加錢，最後個價比原本報價貴咗1.5倍。呢樣都唔係最伏，間嘢明知我趕，開頭又話出晒圖，工廠造傢俬3個星期就得，最後遲咗兩三個禮拜先整好，我已經急個瀨，諗住佢啦啦臨運落咗安裝好，我就俾埋尾數啦，點知間野要我俾晒尾數先肯落單運貨⋯⋯俾晒尾數到時啲傢俬有咩事我都無say啦🙄 事實我都真係無say，趕住用唯有焗俾啦⋯⋯講咗好多次話我趕住入伙，要盡快安排安裝師傅過嚟幫我裝，但又安排唔到，又拖多我一個禮拜⋯⋯ 上面講咗咁耐，都未到劇肉，個安裝師傅帶住兩條𡃁上門裝傢俬，俾密碼佢哋入屋先，我後到，一入屋見佢哋開晒我啲冷氣，單位嘅冷氣全部新無開過，佢哋問都唔問就壇自開晒，裝傢俬又鋸木又大塵，部冷氣實食晒，但為咗佢哋裝得舒服裝得靚，寶寶雖然個心唔舒服，但寶寶不敢說。然而，我啲冷氣嘅犧牲係一啲意義都無咖！個師傅所有要鋸嘅位都係求鬼其，尺都唔用，歪晒，傢俬舖覆尺嗰條友唔知點度尺咖，門框、電掣位度錯晒，個師傅現場改又求鬼其，我個全高鞋櫃差少少唔啱位入，個師傅夾硬打入去，最後鞋櫃側板爆咗！書櫃8度鏡門，淨係門一塊收我1千，但係塊塊都有問題，一係彎，一係花，一係崩，一係就有黑點，事後仲話有黑點正常，全部唔肯換，有啲門嘅拉手底板做錯色，師傅當時話等間廠寄返啱嘅先裝，最後間廠又話爆單又剩無咗影，我個拉手仲係得個隆⋯⋯ 個傢俬師傅好大架子，有隻門打開歪嘅，閂埋就正常，叫佢調返，佢話：你係師傅定我係師傅？邊有人咁驗收咖？總之閂埋無歪。 講完佢頭也不回走咗 傢俬裝完已經3個月，wechat同佢哋講開頭都hea應一兩句，後尾話爆單俾咗條售後link我填嘢，但填完又無人跟進過，根本就無售後⋯⋯ 講漏咗樣，傢俬裝完竟然有板剩，啲板唔係備用板，係有貼紙寫明裝邊嘅板🤦🏻♀️ 伏位不能盡錄⋯⋯ #提奧 #Tio #柯思特美 #Austeme #傢俬黑店 #黑店 #裝修 #公屋裝修 #居屋裝修 #訂造傢俬 #傢俬訂制 #傢俬