【明報專訊】自上月喺金鐘添馬公園舉行嘅「teamLab:光漣」展覽,放置咗200多件「發光蛋(ovoid)」裝置,近日有網民懷疑部分裝置「爆蛋」,漏晒氣軟攤喺地上。Emily噚日下晝去到添馬公園,最少見到4、5個「漏氣蛋」,無幾耐就見到職員幫發光蛋再充氣,而原來「漏氣蛋」係同天氣有關。
康文署同Emily解釋,由於本港天氣自上周起開始唔穩定,天文台近日預報同署方放喺添馬公園嘅風速計,都監測到展覽場地時有陣風、強風同雷暴,所以將部分設於當風位嘅5米高展品放氣,並圍封相關位置,同埋掛上展品維修中嘅告示。
康文署話,會繼續密切關注情况,若天氣轉趨穩定,就會考慮安排相關展品再充氣。