【明報專訊】垃圾徵費明年4月1日實施，政府早前表明唔會再押後。為配合垃圾收費實施，環保署嘅綠展隊今年8月中起喺社區展開推廣工作，於屋苑、「綠在區區」回收點舉辦宣傳活動及示範，教育市民遵守法例要求及乾淨回收。環保署預計，一個3至4人家庭，每日使用一個10公升或15公升嘅指定垃圾袋，每月垃圾費開支約30至50元。
環保署助理環保主任（廢物收集及徵費）黃嘉雯接受「政府新聞網」訪問，佢話垃圾收費係減廢「火車頭」，政府期望透過推行垃圾收費，以污染者自付原則推動公眾同企業實踐減廢回收，並推動回收及相關產業可持續發展，創造就業機會。
市民日後要購買指定垃圾袋棄置垃圾，指定袋分9種大小，容量介乎3至100公升，以每公升垃圾約0.11元計算，每個袋售價約0.3元至11元不等。Emily見到展板除咗介紹各款大細嘅指定袋，部分仲有「實物示範」。至於放唔入指定袋嘅大型垃圾，就要貼上指定標籤先可棄置，每個標籤劃一收費11元。環保署指新一代社區回收網絡綠在區區設立回收環保站，位置貼近民居嘅回收便利點，接收至少9種常見回收物，服務範圍覆蓋全港18區。