一講起TVB經典劇，大家一定唔會唔記得佢，講緊嘅就係《封神榜》呀，真係講起都好想唱「暴君⋯率眾妖害人」！呢套唔經唔覺原來已經有了17年喇，都真係可以話係經典之中嘅經典嚟，唔單止不斷翻拍，仲成日喺電視度重播添～小編今次就同大家回憶吓幾個經典之最喇！
相信最印象深刻一定會係哪叱嘅「削骨還父 削肉還母」呢一幕。
當年小編真係睇到眼濕濕，真係睇見都覺得心酸呀！
另外，不得不提嘅一定係西伯候痛食愛子--「人肉丸」。
伯邑考為咗救西伯候，帶寶物面聖希望可以代父做人質。
點知伯邑考就因為激嬲妲己，而害死自己，仲被整成肉丸被西伯候食添。相信當時好多人對火腿丸留下唔好嘅陰影呀……
小編一開始都講到明係「暴君⋯率眾妖害人」，咁呢位暴君嘅衰嘢又點會咁少呢？！
唔知大家記唔記得比干嘅「七竅玲瓏心」呢？
當年暴君為咗醫治愛妃妲己，而命比干交出自己嘅心，仲話如果佢唔肯自己交出嚟，就命人拎佢個心出嚟，認真暴力，變態呀！
呢啲經典場面，依家諗番起都真係有啲唔明點解當年可以播到出街，再睇番依家啲電視劇真係覺得有啲濕濕碎呀！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
