久未推出廣東話團歌的MIRROR,新跳唱作品〈SHEESH〉昨晚終於上架,上架半日有超過11萬Views。而歌曲無論歌詞及歌名〈SHEESH〉都有意義,想表達的態度就是面對更多不同的聲音,最重都要有自己一套,自信地邁步向前,用行動打破常規。
說到歌名,隊長Lokman說:「〈SHEESH〉呢首歌係想講,側邊聽到好多聲音,話你唔掂,點都好,就回應一句『SHEESH』!然後繼續做好自己。邊個人睇少你都好,要對自己有信心,終有一日會成功㗎!會令對方大跌眼鏡。」而副隊長AK則說:「今次動作上比較玩味重少少,用一個輕鬆態度應對呢啲事情,就好似好多人俾好多唔同意見你,但最後個決定喺自己度,打返自己節奏。好似我哋以前出道會俾人哋話:你哋係Dancer唔識唱歌,但俾人哋標籤咗,係咪就等於我哋就係咁樣?會唔會有方法還擊呢?又或者解釋返我哋嘅狀況呢?〈SHEESH〉有好深嘅意義,大家一齊反省下。」
說到MIRROR成軍五年,Lokman:「可能好多人會標籤MIRROR係一個男團,男團應該要點,要學下人哋點點點。〈SHEESH〉就係講緊,唔好理人哋點睇,做好自己先,答案就交俾人哋答啦!總之做好自己、做咗自己想做嘅嘢就已經OK。我哋唔會答你做唔做到,我哋MIRROR繼續做返自己,俾信心繼續做,個答案俾觀眾自己答返自己。」
而AK則表示:「我唔會話我哋而家已經做到,或者達到到我哋想做嘅嘢,我哋由《造星》走出嚟,大家都疑惑我哋12個得唔得:你哋做歌手?下年就冇啦!我哋而家都堅持到第5年,唔係話我哋而家做得好好,但我哋呢幾年,唔多唔少都有進步,喺呢行係要慢慢Fulfill大家嘅需要,滿足觀眾嘅要求。答案係唔會而家搵得到,不過無論結果係點都好,我哋12個都只不過係鍾意表演嘅小朋友。」