CHILL CLUB︱TY代領獎疑失言　林家謙驚驚：唔好咁講！

歌手Tyson Yoshi（TY）昨晚（12日）於《CHILL CLUB推介榜 年度推介23/24》頒獎禮中代好友林家謙上台接受「年度唱作歌手」獎項，佢更代對方發表得獎感受時語出驚人謂：「唔係佢勁，係你哋廢。」成為網友熱論話題。TY驚人言論一出，唔少網友都擔心佢會累到本身攞獎嘅林家謙，TY更被指態度囂張，而「主角」林家謙今日（13日）即急急出post，轉發TY代為領獎疑失言嘅post，並謙虛留言：「唉千祈唔好咁講」疑似對好友嘅言論補鑊。

林家謙亦先後轉發ViuTv畫面，因Tyson Yoshi代佢上台，所以當電視畫面打出得獎人係林家謙個名時，出現喺鏡頭卻係TY嘅趣怪畫面，佢即轉發網友P圖、Key番林家謙個樣上去嘅假截圖，當係「親身」上台領獎。

對於種種是非，林家謙同事表示：「家謙有工作在身所以缺席，那句當然不是家謙意思啦。除了『多謝後面的thank you list』及『母親節快樂』，其他都是Tyson自己發揮的，謝謝，哈哈！」