12星座最啱做邊個行業？

求職擇業往往令人最頭痛，要考慮自己嘅興趣才能，更多時候會受到身邊嘅人如家人、朋友嘅影響。12星座各有性格才能，睇吓每個星座最啱做邊個行業！

白羊座

白羊座行動力強，充滿活力，不能夠坐定定，所以唔太適合啲朝九晚五要坐喺office嘅工。反而一啲可以成日跑嚟跑去，例如sales，紀律部隊、記者、健身導師等，都會比較適合白羊，做起事上嚟特別有幹勁。

金牛座

金牛嘅感官比較強，對於美食、藝術、生活享受都有唔錯嘅觸覺同品味，可以從事飲食業、藝術文化、感官享受相關嘅工作，例如品酒師、香薰治療、甜品師傅之類。不過金牛很需要安全感，工作一定要穩定，有保障。

雙子座

雙子座興趣多多，多才多藝，最強嘅係溝通能力，都識與唔同人打交道，可從事同通訊有關嘅工作，例如公關、記者、marketing、電腦、電訊行業。最緊要份工多變化，有新鮮感，否則雙子做唔長。

巨蟹座

巨蟹座細心敏感，容易察覺到別人嘅需要，亦樂於照顧別人，將事情打點得好好。可以做啲護理、照顧他人嘅工作，亦可以係辦公室中嘅行政、人事部，都能夠將身邊嘅人照顧得妥妥貼貼。另外，巨蟹亦同家居有關，家居設計、家品行業都適合。

獅子座

獅子座表演慾強，天生有一份魅力，能夠引人注意，大可以試試演藝行業，做幕前嘅演出。另外，獅子富有領導才能，所以可以培養自己做管理層嘅工作。行業方面，奢侈品、時裝之類都好啱獅子嘅胃口。

處女座

處女座做事勤奮低調，雖然份人挑剔，但服務精神強，從事服務業最適合。另外，處女座擅於分析思考，可以做評論員、會計、分析員等。處女座亦對應健康，可以試試醫療、護理、健康用品相關行業。

天秤座

天秤座係社交高手，識得與不同嘅人打交道，平衡各方嘅利益，相當適合從事跟「人」有關嘅工作，例如公關、客戶服務、人力資源。另外，天秤喺藝術、美感方面都有天份，化妝、音樂、設計等工作都可以有得發揮。

天蠍座

天蠍座意志堅定，對事業有野心，基本上設定咗目標就會努力去達成。天蠍份人比較低調，最好做啲幕後嘅工作，例如研究員、分析師之類。天蠍喜歡研究人性同心理，對神秘學有興趣，可以做心理治療、玄學、塔羅占卜師。

人馬座

人馬座熱愛自由，唔能夠被管束，刻板嘅工作絕對不能接受。人馬座有冒險精神，似馬一樣鍾意四圍走，可以從事旅遊業、新聞、傳媒、娛樂業嘅工作。人馬熱衷追求知識、人生哲理，宗教、政治、教育嘅行業都適合。

山羊座

山羊座重視事業成就，總希望可以攀上成功嘅階梯，亦認為喺大機構工作先有身份地位。而山羊做事勤奮、有系統，適合做行政管理工作，亦唔介意從低做起，一步步爬上去。可以去大公司做trainee或做政府工。

水瓶座

水瓶座古靈精怪，相當有創意，亦好有科學頭腦，可以做啲科研、寫apps、設計、發明呢類型嘅工作。水瓶座亦有關注社會嘅心，所以另一方向就係服務社會，為大眾爭取利益，好似社會福利、政策研究等。

雙魚座

對於自己要做啲咩，雙魚座總係唔太清晰，其實雙魚座唔要啲咩名成利就，不過搵到適合嘅工作都好重要。雙魚對於文化藝術有天份，音樂畫畫、手作、做吓飾品、化妝等都可以。另外，抱住一份大愛精神，雙魚亦可加入慈善機構。